Оғози сохтмони бузургтарин маҷмааи коргоҳҳои нассоҷӣ дар ноҳияи Данғара

Имрӯз дар ноҳияи Данғара бо иштироки Президенти кишвар Эмомалӣ Раҳмон ба сохтмони бузургтарин маҷмааи коргоҳҳои нассоҷӣ дар Осиёи Марказӣ оғоз бахшида шуд, ки дар марҳилаи аввали он беш аз 52 000 тонна нахи пахта мавриди коркарди саноатӣ қарор мегирад.
Зимни шиносоӣ бо лоиҳаи сохтмон, аз ҷумла иттилоъ дода шуд, ки дар 4 марҳила дар ин ҷо 4 корхонаи нав - ресандагӣ, бофандагӣ, рангубори матоъ ва дӯзандагӣ бунёд ёфта, дар маҷмӯъ 6 ҳазор шаҳрвандони Тоҷикистон бо кори доимӣ ва маоши баланд таъмин мешаванд.
Мавриди зикр аст, ки ин маҷмааи муштараки Тоҷикистону Чин буда, коргоҳҳои саноатии он бо ворид намудани навтарин технология аз ширкатҳои дорои шуҳрати ҷаҳонӣ аз Иёлоти Муттаҳидаи Амрико, кишварҳои аврупоии Италия, Швейсария, Олмон ва аз худи Чин бунёд меёбад. Намояндагони ҳамаи ин ширкатҳо дар гузоштани санги асоси маҷмаа ва нома ба насҳои оянда иштирок доштанд.
Дар навбати аввал ё худ дар корхонаи ресандагии маҷмаа, ки то моҳи октябри соли 2015 ба кор омода хоҳад шуд, 600 нафар шаҳрвандони Тоҷикистон ба кор ҷалб карда мешаванд.
Дар корхонаи бофандагии он ҳангоми бо иқтидори пурра ба кор даромаданаш солона то 150 миллион метри мураббаъ матоъҳои хушсифати пахтагӣ истеҳсол карда хоҳад шуд.
Барои таъмини ин маҷмаа бо мутахассисони дорои тахассуси олӣ ҳоло дар муассисаҳои таҳсилоти олии техникӣ ва технологии Тоҷикистон ва 2 донишгоҳи Федератсияи Русия садҳо нафар таҳсили илм мекунанд. Танҳо дар 2 донишгоҳи Русия 640 ҷавони тоҷик бо ихтисосҳои нассоҷӣ ва дигар бахшҳои агросаноатӣ таҳсил доранд, ки 520 нафари онҳо аз вилояти Хатлон мебошанд. Дар Донишгоҳи давлатии Данғара ва омӯзишгоҳи касбию техникии он низ заминаи зарурӣ барои омода намудани чунин мутахассисон муҳайё гардидааст.
Сарвари давлат Эмомалӣ Раҳмон зимни суханронӣ, аз ҷумла зикр намуд, ки ин маҷмаа бо харҷи қариб 1,5 миллиард сомонӣ дар зарфи 2 соли оянда сохта ва пурра ба кор дароварда мешавад.
Тавре таъкид гардид, сабаби асосии дар ноҳияи Данғара бунёд ёфтани ин маҷмаа иқлими мусоиди ин минтақа барои истеҳсоли навъҳои пахтаи дорои нахи дароз ва захираи аз ҳама зиёди заминҳои азхудшавандаи ҷумҳурӣ дар ин ноҳия мебошад.
Чунонки таъкид гардид, дар доираи татбиқи ин лоиҳа ҳамчунин бо ҷалби навтарин технологияи соҳа дар зиёда аз 15 ҳазор га заминҳои боир, камоб ва нав обёришавандаи 5 ноҳияи вилояти Хатлон кишти пахта ба роҳ монда шуда, боз қариб 15 ҳазор каси дигар бо кор таъмин мегарданд.
Аллакай баҳори соли 2015 дар 5800 га замин навъҳои беҳтарин, серҳосил ва ба иқлими минтақа мутобиқи пахта кишт карда мешавад, ки ҳосили интизорӣ аз ҳар гектари ба ҳисоби миёна 70 сентнер мебошад. То охири соли 2015 10 ҳазор га заминҳои нав обёрӣ карда мешаванд. Барои ин аллакай 78 адад трактор ва дигар техникаи пуриқтидори зарурӣ ворид карда шудааст.
Дар 3 ноҳияи вилояти Хатлон, аз ҷумла Данғара ва Ҷиликул 3 корхонаи пахтатозакунӣ бунёд меёбад, ки онҳо метавонанд дар як сол беш аз 80 ҳазор тонна пахтаро тоза намоянд.
Дар маросими тантанавии оғози сохтмони ин маҷмааи бузурги нассоҷӣ ҳамчунин Сафири фавқулодда ва мухтори Ҷумҳурии Мардумии Чин дар Тоҷикистон Фан Сянжун, муовини роҳбари ноҳияи мухтори Синзянуйғури Чин Хан Йонг ва намояндани ширкати Ҷун Тайи ин кишвар ва дигар меҳмонони хориҷӣ сухан ронда, ҳозирин ва кулли мардуми Тоҷикистонро бо ин рӯйдоди фараҳбахш табрику таҳният гуфтанд.