Дар бораи Кумита

Кумитаи телевизион ва радиои назди Ҳукумати Ҷумҳурии Тоҷикистон (минбаъд Кумита) мақоми марказии ҳокимияти иҷроия буда, вазифа оид ба гузаронидани сиёсати давлатӣ, танзими меъёрии ҳуқуқӣ ва роҳбариро дар соҳаи телевизион, радио ва кино амалӣ мегардонад.

Кумита дар фаъолияти худ Конститутсия (Сарқонуни) Ҷумҳурии Тоҷикистон, қонунҳои Ҷумҳурии Тоҷикистон, қарорҳои Маҷлиси Олии Ҷумҳурии Тоҷикистон, санадҳои Президенти Ҷумҳурии Тоҷикистон ва Ҳукумати Ҷумҳурии Тоҷикистон, санадҳои меъёрии ҳуқуқии байналмилалии аз ҷониби Ҳукумати Ҷумҳурии Тоҷикистон эътирофшуда ва ҳамин Низомномаро ба роҳбарӣ мегирад.

Кумита фаъолияти худро дар ҳамкорӣ бо дигар мақомоти марказии ҳокимияти иҷроия, мақомоти иҷроияи маҳаллии ҳокимияти давлатӣ, иттиҳодияҳои ҷамъиятӣ ва дигар ташкилотҳо амалӣ мегардонад.

Кумита дар соҳаи муқарраршудаи фаъолият ваколатҳои зеринро амалӣ мегардонад:
- ба Ҳукумати Ҷумҳурии Тоҷикистон лоиҳаҳои қонунҳои Ҷумҳурии Тоҷикистон, санадҳои Президенти Ҷумҳурии Тоҷикистон, Ҳукумати Ҷумҳурии Тоҷикистон ва дигар санадҳои меъёрии ҳуқуқие, ки нисбат ба соҳаи фаъолияти Кумита муқаррар шудааст, инчунин лоиҳаҳои нақшаи кор ва нишондиҳандаҳои пешакии фаъолияти Кумитаро пешниҳод мекунад.

Дар асоси қонунгузории Ҷумҳурии Тоҷикистон дар бораи телевизион ва радио ва дигар қонунҳои вобаста ба соҳаи муқарраршудаи фаъолият:
- аз ҷониби ташкилотҳои телевизион ва радио риоя намудани талаботи қонунгузории Ҷумҳурии Тоҷикистонро таҳти назорат мегирад;
- барномаву гуфторҳои телевизионӣ, радиоӣ, ахбор ва аз ҷониби ташкилотҳои телевизион ва радио риоя шудани талаботи техникии сифати пахшро назорат мекунад;
- барои фаъолият дар соҳаи телевизион ва радио, истеҳсоли маҳсулоти аудиовизуалӣ иҷозатнома медиҳад ва аз тарафи иҷозатномадошта риоя шудани талабот ва шартҳои иҷозатномаро назорат мекунад;
- тартиби истифодаи шабакаҳои пахшро бо мақсади паҳн намудани барномаҳои телевизионӣ ва радиоӣ муайян мекунад;
- риояи тартиби истифодаи шабакаҳои пахшро барои паҳн намудани барномаҳои телевизионӣ ва радиоӣ назорат мекунад;
- тартиби инжинерию техники истифодаи пахши шабакаи қайҳонро муайян мекунад;
- риояи тартиби истифодаи пахши шабакаи кайҳонро назорат менамояд;
- тартиби истифодаи шабакаи пахши кабелиро (ноқилиро) муайян мекунад;
- риояи тартиби истифодаи шабакаи пахши кабелиро (ноқилиро) назорат мекунад;
- тартиб, мӯҳлат ва шартҳои нигоҳдории дарозмуддати барномаҳои телевизион ва радио, маводи кино ва филмҳоро, ки арзиши таърихӣ, бадеӣ, фарҳангӣ ва дигар арзишҳо мебошанд, муайян менамояд.

Дар асос ва ҷиҳати иҷрои Конститутсия (Сарқонуни) Ҷумҳурии Тоҷикистон, қонунҳои конститутсионӣ, қонунҳо, санадҳои Президенти Ҷумҳурии Тоҷикистон ва Ҳукумати Ҷумҳурии Тоҷикистон дар соҳаи муқарраршудаи фаъолият мустақилона санадҳои меъёрии ҳуқуқии зеринро таҳия ва тасдиқ мекунад:
- қоидаи истифодаи воситаҳои техникии телевизион ва радио, дигар воситаҳои электронии ахбори умум;
- қоидаҳои тафтиши фаъолияти субъектҳои хоҷагидор дар соҳаи телевизион, радио ва истеҳсоли маҳсулоти аудиовизуалӣ дар Тоҷикисон;
- низомномаҳои ташкилотҳои соҳаи муқарраргардидаи фаъолият;
- оинномаҳои корхонаҳои воҳид дар соҳаи муқарраршудаи фаъолият;
- низомномаҳои тарификатсия (аттестатсия) кормандони истеҳсолию эҷодӣ ва истеҳсолию техникии телевизион, радио ва кино;
- низомномаҳои гузаронидани фестивалҳо, озмунҳо, симпозиумҳо, викторинаҳо ва ғайра дар соҳаи муқарраршудаи фаъолият;
- санадҳои меъёрии ҳуқуқӣ оид ба масъалаҳои дигари соҳаи муқарраршудаи фаъолият;

Дар асос ва бо тартиби муқаррарнамудаи қонунҳо, санадҳои Президенти Ҷумҳурии Тоҷикистон ва Ҳукумати Ҷумҳурии Тоҷикистон Кумита оид ба идораи амволи давлатӣ ва хизматрасонии давлатӣ дар соҳаи муқаррарнамудаи фаъолият вазифаҳои зеринро амалӣ мегардонад:
- ба фаъолияти телевизион, радио ва кино дар Ҷумҳурии Тоҷикистон роҳбарӣ мекунад, оид ба сатҳи касбии барномаҳои телевизион, радио ва маҳсулоти кино назорат мебарад, дурнамо ва самтҳои асосии рушди теелевизион, радиошунавонӣ ва истеҳсоли киноро дар ҷумҳурӣ муайян мекунад;
- мутобиқи қонунгузории Ҷумҳурии Тоҷикистон, дигар санадҳои меъёрии ҳуқуқӣ, тартиби харидорӣ ва истифодаи асарҳои адабиёт ва санъатро барои телевизион, радио ва кино муқаррар менамояд;
- бо тартиби муқарраршуда озмунҳо мегузаронад, аз ҷумла барои беҳтарин барномаҳои телевизион, радио ва сенарияи кино, асарҳои бадеию мусиқӣ, барои таъмини мол, харидории дастгоҳҳои телерадио ва барои намоишу дар мавҷ пахш намудани маҳсулоти телерадиокино, иҷрои корҳои мавриди ниёзи Кумита, ҳамчун гузаронидани корҳои технологии мавриди ниёзи давлат дар соҳаи муқарраршудаи фаъолият шартномаҳои давлатӣ мебандад;
- тибқи тартибот ва доираи муқаррарнамудаи қонунҳо, санадҳои Президенти Ҷумҳурии Тоҷикистон ва Ҳукумати Ҷумҳурии Тоҷикистон нисбат ба амволи давлатии барои таъмини иҷрои вазифаҳои мақомоти марказии ҳокимияти иҷроия зарур дар соҳаи муқарраршудаи фаъолият, аз ҷумла амволи ташкилотҳои системаи Кумита ваколатҳои моликро амалӣ мегардонад;
- фаъолияти иқтисодии ташкилотҳои шомил ба Нақшаи идоракунӣ ва системаи Кумитаро таҳлил мекунад, нишондиҳандаҳои иқтисодии онҳоро тасдиқ менамояд, оид ба фаъолияти онҳо санҷиши молиявию хоҷагӣ ва истифодаи маҷмӯи амволро тафтиш менамояд;
- дар асоси тадқиқоти илмӣ ва гузаронидани таҷрибаҳо татбиқи намудҳои нави технологияро ба барномаҳои давлатӣ ворид месозад;
- аз ҳисоби буҷети ҷумҳуриявӣ чорабиниҳои дорои аҳамияти ҷумҳуриявиро дар соҳаи телевизион, радио ва кино ташкил ва таъмин менамояд;
- рушди соҳа, аз ҷумла таҳкими заминаи моддию техникии телевизион, радиошунавонӣ ва истеҳсоли кино, марказҳо ва муассисаҳои таълимиро дастгирӣ менамояд;
- таъмини барномавӣ ва илмию методии соҳаи телевизион, радиошунавонӣ ва киноро мутобиқи барномаи рушди соҳа ташкил, адабиёти илмию таълимӣ ва илмию оммавӣ нашр мекунад;
- дар соҳаи телевизион, радиошунавонӣ ва кино системаи ягонаи давлатии таъмини иттилоотро созмон медиҳад;
- вазифаи фармоишдиҳандаи давлатии барномаҳо ва лоиҳаҳои мақсадноки илмию техникӣ, инноватсиониро дар соҳаи муқарраршудаи фаъолият иҷро мекунад;
- регистри маҳсулоти кино ва феҳристи номгӯи ташкилотҳои барои фаъолият дар соҳаи муқарраршуда иҷозатномагирифтаро ба роҳ мемонад;
- қабули шаҳрвандонро ташкил мекунад, баррасии саривақтии муроҷиатҳои шифоҳӣ ва хаттии шаҳрвандон, аз рӯи онҳо қабул гардидани қарорҳо ва дар мӯҳлати муқарраркардаи қонунгузории Ҷумҳурии Тоҷикистон ба аризадиҳандагон фиристодани ҷавобҳоро таъмин менамояд;
- дар доираи салоҳияти худ ҳимояи иттилооти дорои сирри давлатиро таъмин менамояд;
- тайёрии сафарбаркунии Кумита, ҳамчунин назорат ва ҳамоҳангсозии фаъолияти ташкилотҳои тобеъро оид ба тайёрии сафарбаркунӣ таъмин менамояд;
- тайёрии касбии кормандони Кумита, тағйир ва такмили ихтисос ва коромӯзии онҳоро ташкил мекунад;
- тибқи тартиби муқарраршуда бо мақомоти ҳокимияти давлатии давлатҳои хориҷӣ, ташкилотҳои байналмилалӣ ва хориҷӣ дар соҳаи муқарраршудаи фаъолият ҳамкорӣ мекунад;
- мутобиқи қонунгузории Ҷумҳурии Тоҷикстон оид ба мукаммалгардонӣ, нигоҳдорӣ, баҳисобгирӣ ва истифодаи ҳуҷҷатҳои бойгонӣи маводи аудиовидео ва кино дар тӯли фаъолияти Кумита ҷамъшуда кор мебарад;
- тибқи тартиби муқарраршуда дар соҳаи муқарраршудаи фаъолият конгрессҳо, конфренсияҳо, семинарҳо, намоишгоҳҳо ва дигар чорабиниҳо ташкил мекунад;
- таҷрибаи истифодаи қонунгузориро дар соҳаи муқарраршудаи фаъолият ҷамъбаст мекунад;
- вазифаи тақсимкунандаи асосӣ ва қабулкунандаи маблағҳои буҷаи ҷумҳуриявиро, ки барои нигоҳдории Кумита ва амалӣ гардонидани вазифаҳои ба зиммаи он гузошташуда ҷудо шудааст, иҷро менамояд;
- вазифаҳои дигареро, ки қонунгузории Ҷумҳурии Тоҷикистон манъ намекунад ва ба иҷрои вазифаҳои асосии рушди заминаи моддию техникӣ, беҳдошти шароити иҷтимоӣ мусоидат мекунанд ва ғайра амалӣ мегардонад.
Бо мақсади татбиқи ваколатҳо дар соҳаи муқарраршудаи фаъолият Кумита ҳуқуқ дорад:
- бо тартиби муқарраршуда маълумоти заруриро барои қабул намудани қарор оид ба масъалаҳои соҳаи муқарраршудаи фаъолият аз мақомоти дигари дахлдор дархост кунад ва гирад;
- ба шахсони ҳуқуқӣ ва воқеӣ оид ба масъалаҳои соҳаи муқарраршудаи фаъолият шарҳу эзоҳ диҳад;
- мутобиқи муқаррарот ташкилотҳои илмӣ ва дигар ташкилотҳо, олимон ва мутахассисонро барои баррасии масъалаҳои соҳа ҷалб намояд;
- дар соҳаи муқарраршудаи фаъолият мақомоти ҳамоҳангсозӣ, машваратӣ ва экспертӣ (шӯроҳо, комиссияҳо, гурӯҳҳо, ҳайати мушовара), аз ҷумла мақомоти байниидоравӣ таъсис диҳад;
- тибқи муқаррарот нишонҳои ифтихорӣ таъсис диҳад ва бо онҳо кормандонро барои муваффақиятҳояшон дар соҳаи телевизион, радиошунавонӣ ва кино сарфароз гардонад;
- тибқи муқаррарот хадамоти телевизион, радио, кино ва ташкилотҳо, шабакаҳои иттилоотӣ, ҷиҳати чопи санадҳои меъёрию ҳуқуқӣ, эълонҳои расмӣ, ҷой додани мавод оид ба масъалаҳои соҳаи муқарраршудаи фаъолият воситаҳои чопии ахбори омма таъсис диҳад;
- ҳаҷм ва тартиби пардохти ҳаққи муаллифӣ, басаҳнагузорӣ ва иҷрокунандагии ҳамаи намудҳои асарҳоро барои телевизион, радио ва истеҳсоли кино, ҳамчунин меъёрҳоро баро эҷоди асарҳои адабию бадеӣ, сенарияҳои оригиналии адабӣ, мусиқӣ барои ҳамаи намудҳои барномаҳои телерадиоӣ ва филмҳо муайян менамояд;
- тартиб додани вақти эфирро ба ташкилотҳои давлатӣ, ҷамъиятӣ ва дигар ташкилотҳо, ҳамчунин ба шахсони хусусӣ дар асоси қарордод, ҷой додани маводи рекламавӣ ва барномаҳои пулакиро дар барномаҳои телевизион ва радио муқаррар мекунад;
- бо қарори ҳайати мушовара ҳаҷми изофапулӣ, мукофот ва дигар пардохтҳои дорои хусусияти ҳавасмандгардониро ба ҳамаи категорияҳои кормандон, аз ҷумла роҳбарони Кумита, аз ҳисоби даромадҳои иловагӣ ва дар ҳудуди маблағи аз буҷет ҷудошуда муайян ва муқаррар менамояд;
- дар асоси шартнома ба барномаҳои фармоишии телевизиону радиоӣ ва маҳсулоти кино, ҳамчунин ба хизматрасонӣ ва ҷой додани рекламаҳо нархҳоро муайян мекунад;
- меъёрҳои хароҷоти маблағҳоро барои гузаронидани озмунҳо, фестивалҳо, конференсияҳо, семинарҳо, викторинаҳо ва дигар чорабиниҳои ба соҳаи муқарраршудаи фаъолият вобаста таҳия ва тасдиқ менамояд;
Кумита ҳуқуқ надорад дар соҳаи муқарраршудаи фаъолият вазифаи назорат ва идораи амволи давлатиро амалӣ гардонад, ба истиснои ҳолатҳое, ки қонунҳо, фармонҳои Президенти Ҷумҳурии Тоҷикистон қарорҳои Ҳукумати Ҷумҳурии Тоҷикистон муқаррар намудаанд.
Маҳдудияти муқаррарнамудаи сархати аввали банди мазкур оид ба ваколати Кумита ба ваколатҳои Раиси Кумита, ҳамчунин ба ваколатҳои ӯ оид ба назорати фаъолияти сохторҳои таркибии кумита дахл надорад.
Ба Кумита Раис роҳбарӣ мекунад, ки ӯро Ҳукумати Ҷумҳурии Тоҷикистон ба вазифа таъйин ва аз вазифа озод менамояд.
Раиси Кумита барои иҷрои ваколатҳои ба зиммаи Кумита гузошташуда ва амалӣ гардонидани сиёсати давлат дар соҳаи муқарраршудаи фаъолият масъулияти шахсӣ дорад.
Раиси Кумита муовини аввал ва муовинон дорад, ки онҳоро бо пешниҳоди раиси Кумита Ҳукумати Ҷумҳурии Тоҷикистон ба вазифа таъйин ва аз вазифа озод менамояд.
Шумораи муовинони раиси Кумита аз ҷониби Ҳукумати Ҷумҳурии Тоҷикистон муқаррар карда мешавад.
Сохторҳои таркибии Кумита раёсат ва шӯъбаҳо оид ба самтҳои асосии фаъолияти кумита ба шумор мераванд.
Раиси Кумита:
- вазифаҳоро байни муовинони худ тақсим мекунад;
- низомномаи сохторҳои таркибии Кумитаро тасдиқ мекунад;
- кормандони кумитаро ба вазифа ва аз вазифа озод мекунад;
- мутобиқи қонунгузории Ҷумҳурии Тоҷикистон оид ба хизмати давлатӣ масъалаҳои вобаста ба гузаштани хизмати давлатиро дар Кумита ҳал менамояд;
- ҷадвали корбасти Кумитаро дар ҳудуди фонди музди меҳнат ва шумораи кормандон, ки Ҳукумати Ҷумҳурии Тоҷикистон муқаррар намудааст, сметаи хароҷоти Кумитаро дар ҳудуди маблағгузории барои марҳалаи марбутаи дар буҷети ҷумҳуриявӣ пешбинишуда тасдиқ мекунад;
- ба Вазорати молияи Ҷумҳурии Тоҷикистонр оид ба тартиб додани буҷети ҷумҳуриявӣ ва маблағгузории Кумита пешниҳод манзур мекунад;
- тибқи муқаррарот роҳбарони муассисаҳои тобеъ ва дигар ташкилотҳоро ба вазифа таъйин ва аз вазифа озод менамояд ва ё бо роҳбарони мазкур қарордодҳои меҳнатӣ мебандад, онро тағйир медиҳад ва бекор месозад;
- бо тартиби муқарраргардида кормандони Кумита ва дигар шахсони дар соҳаи муқарраршудаи фаъолият амалкунандаро барои гирифтани унвонҳои фахрӣ ва ҷоизаҳои давлатии Ҷумҳурии Тоҷикистон пешниҳод мекунад;
- дар асос ва ҷиҳати иҷрои Конститутсия (Сарқонуни) Ҷумҳурии Тоҷикистон, қонунҳои конститутсионӣ, қонунҳо, санадҳои Президенти Ҷумҳурии Тоҷикистон ва Ҳукумати Ҷумҳурии Тоҷикистон оид ба масъалаҳои ба салоҳияти Кумита дахлдор ва ҳамчунин оид ба масъалаҳои ташкили кори Кумита фармонҳо медиҳад;
- ба баррасии Ҳукумати Ҷумҳурии Тоҷикистон лоиҳаҳои санадҳои меъёрии ҳуқуқии зеринро пешниҳод мекунад:
Низомнома, схемаи идоракунӣ ва сохтори дастгоҳи марказии Кумита;
- номзадҳо ба вазифаи муовини аввал, муовинҳои Раиси кумита;
- дар бораи таъсис, азнавташкилдиҳӣ ва барҳам додани ташкилотҳои давлатие, ки ба Нақшаи идоракунӣ ва системаи кумита шомиланд;
- нақшаи ҳарсола ва нишондиҳандаҳои пешакии фаъолияти Кумита ва ҳамчунин ҳисобот аз фаъолияти он.
Дар Кумита дар ҳайати Раис ва муовинони ӯ аз рӯи вазифа, инчунин дигар кормандони роҳбарикунандаи Кумита ҳайати мушовара таъсис дода мешавад. Аъзои ҳайати мушовараи Кумитаро Ҳукумати Ҷумҳурии Тоҷикистон тасдиқ ва аз иҷрои ин вазифа озод мекунад. Ҳайати мушовара дар маҷлисҳои мунтазами худ масъалаҳои асосии рушди соҳа ва дигар масъалаҳои фаъолияти Кумитаро баррасӣ мекунад, масъалаҳои роҳбарии амалиро ба воҳидҳои сохторӣ, санҷиши натиҷаи иҷро, интихобу истифодаи кадрҳо, лоиҳаи фармону дастурҳои муҳимро муҳокима намуда, ҳисоботи роҳбарони воҳидҳои сохтории дастгоҳи марказӣ ва ташкилотҳое, ки ба Нақшаи идоракунӣ ва системаи Кумита шомилбударо мешунавад. Қарорҳои ҳайати мушовара бо фармони Раиси Кумита амалӣ мегарданд.
Дар ҳолати ихтилофот байни Раис ва ҳайати мушовара Раис қарорҳои худро амалӣ мегардонад ва дар бораи ихтилофоти ба миёномада ба Ҳукумати Ҷумҳурии Тоҷикистон хабар медиҳад. Аъзои ҳайати мушовара дар навбати худ метавонанд фикри хешро ба Ҳукумати Ҷумҳурии Тоҷикистон расонанд.

Маблағгузории хароҷот барои нигаҳдошти дастгоҳи марказии Кумита ва мақомоте, ки ба Нақшаи идоракунии Кумита шомиланд, инчунин ташкилотҳои системаи Кумита аз ҳисоби буҷети ҷумҳуриявӣ ва тибқи тартиби муқарраргардида, аз ҳисоби маблағҳои махсус ва ҳисоби хоҷагидорӣ анҷом дода мешавад.
Кумита шахси ҳуқуқӣ ва дорои мӯҳр бо тасвири Нишони давлатии Ҷумҳурии Тоҷикистон ва сабти номи худ бо забонҳои давлатӣ, мӯҳрҳои дахлдор, штампу варақаҳо буда, аз суратҳисоби ягонаи хазинадории Вазорати молияи Ҷумҳурии Тоҷикистон маблағгузорӣ мегардад.
Маҳалли ҷойгиршавии Кумита: 734025, Ҷумҳурии Тоҷикистон, шаҳри Душанбе, кӯчаи Чапаев, 31