Аз 7 то 10 феврал дар Ҷумҳурии Исломии Эрон Намоишгоҳи 16-уми байналмилалии сайёҳӣ ва саноатии Теҳрон баргузор гардид, ки дар он имконоти сайёҳии Тоҷикистон муаррифӣ карда шуданд. Дар ин хусус ба АМИТ «Ховар» дар Кумитаи рушди сайёҳии назди Ҳукумати Ҷумҳурии Тоҷикистон иттилоъ доданд.

Гуфта шуд, ки бо дастгирии Ҳукумати Ҷумҳурии Тоҷикистон дар кори намоишгоҳ намояндагони Кумитаи рушди сайёҳии назди Ҳукумати Ҷумҳурии Тоҷикистон, Сафорати Ҷумҳурии Тоҷикистон дар Ҷумҳурии Исломии Эрон ва роҳбарону намояндагони ширкатҳои сайёҳии ватанӣ иштирок намуданд.

Дар гӯшаи сайёҳии мамлакат бартарияти рақобатнокии Тоҷикистон, аз ҷумла, иқтидори бойи табиӣ, сайёҳии табобатию солимгардонӣ ва имконоти машғулият бо намудҳои сайёҳии экологӣ, варзишию кӯҳнавардӣ, фарҳанги нодир ва тамаддуни бою қадимӣ ба маърази тамошо гузошта шуданд.

АМИТ «Ховар»

Наҷотдиҳандагони Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон шабонарӯзи гузашта дар вилояти Қаҳрамонмараши Ҷумҳурии Туркия 17 соат корҳои ҷустуҷӯӣ-наҷотдиҳӣ анҷом дода, аз зери харобаҳои як бинои истиқоматии шашошёна ҷасади 9 нафарро берун оварданд. Дар ин хусус АМИТ «Ховар» бо истинод ба Кумитаи ҳолатҳои фавқулода ва мудофиаи гражданӣ хабар медиҳад.

«Мутахассисони мо дар ноҳияе, ки аз заминларзаи харобиовар бештар зарар дидааст, кор мекунанд. Техника бо ковшҳо пораҳои вазнини харобаҳоро яктарафа карда, наҷотдиҳандагони Кумита бо таври дастӣ он ҷойҳоеро, ки ҳоло метавонанд одамон дар зери харобаҳо бошанд, тоза менамоянд», — омадааст дар иттилоия.

11 феврал, соати 08:00 ба вақти Туркия наҷотдиҳандагони Тоҷикистон корҳои ҷустуҷӯӣ-наҷотдиҳии худро идома доданд.

Ҳамзамон дар минтақаи офати табиӣ дар баробари наҷотдиҳандагон чор корманди Сафорати Ҷумҳурии Тоҷикистон дар Туркия низ фаъолият доранд.

АМИТ «Ховар»

АМРИ
ПРЕЗИДЕНТИ ҶУМҲУРИИ ТОҶИКИСТОН

1. Вазорати молияи Ҷумҳурии Тоҷикистон аз ҳисоби маблағҳои фонди захиравии Президенти Ҷумҳурии Тоҷикистон дар соли 2023 ба Кумитаи кор бо ҷавонон ва варзиши назди Ҳукумати Ҷумҳурии Тоҷикистон барои мукофотонидани 35 нафар ғолибон ва ҷоизадорони мусобиқаҳои байналмилалии варзишӣ ва мураббиёни онҳо тибқи рӯйхати замимагардида 568 750 (панҷсаду шасту ҳашт ҳазору ҳафтсаду панҷоҳ) сомонӣ ҷудо намояд.

2. Кумитаи кор бо ҷавонон ва варзиши назди Ҳукумати Ҷумҳурии Тоҷикистон истифодаи саривақтӣ ва мақсадноки маблағҳои ҷудошударо таъмин карда, ба Вазорати молияи Ҷумҳурии Тоҷикистон ҳисоботи хароҷоти анҷомдодаро пешниҳод намояд.

Президенти
Ҷумҳурии Тоҷикистон Эмомалӣ Раҳмон

ш. Душанбе
11 феврали соли 2023
№АП-333

Шурӯъ аз 8 феврал маҳдудиятҳо вобаста ба пешгирӣ аз интиқол ва пайдоиши сирояти нави коронавируси COVID-19 дар гузаргоҳҳои сарҳади давлатии Тоҷикистон бекор карда шуданд. Дар робита ба ин қарори дахлдори Ситоди ҷумҳуриявӣ оид ба пурзӯр намудани чораҳои зиддиэпидемикӣ барои пешгирии интиқол ва пайдоиши сирояти нави коронавируси COVID-19 дар Ҷумҳурии Тоҷикистон ба тасвиб расид, хабар медиҳад АМИТ «Ховар».

Бо қарори Ситоди ҷумҳуриявӣ оид ба пурзӯр намудани чораҳои зиддиэпидемикӣ барои пешгирии интиқол ва пайдоиши сирояти нави коронавируси COVID-19 аз 8 феврали соли 2023 маҳдудияти зидди бемории сироятии коронавирус дар тамоми нуқтаҳои карантинию санитарии Хадамоти назорати давлатии санитарию эпидемиологии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар назди гузаргоҳҳои сарҳади давлатии Ҷумҳурии Тоҷикистон бекор карда шуданд.