Э. Раҳмон ба ҷаласаи Шӯрои сарони давлатҳои СҲШ кори пурсамар хост
Имрӯз шаҳри Душанбе макони баргузории ҷаласаи навбатии Шӯрои сарони давлатҳои аъзои Созмони ҳамкории Шанхай гашта, дар маркази таваҷҷуҳи аҳли ҷаҳон қарор гирифтааст, зеро ҷараёни ин ҳамоиши бузург аз ҷониби тамоми васоити ахбори оммаи ҷаҳонӣ, ки беш аз 500 нафар намояндагонашон бевосита дар пойтахти Точикистон қарор доранд, инъикос мегардад.
Дирӯз барои иштирок дар ҳамоиши дорои аҳамияти бузурги минтақавию ҷаҳонӣ дар шаҳри Душанбе - пойтахти Тоҷикистон роҳбарони ҳамаи 6 давлати аъзои Созмони ҳамкории Шанхай, аз ҷумла Ҷумҳурии Мардумии Чин -Си Ҷинпин, Федератсияи Русия - Владимир Путин, Ҷумҳурии Қазоқистон -Нурсултон Назарбоев, Ҷумҳурии Қирғизистон - Алмазбек Атамбаев, Ҷумҳурии Ӯзбекистон -Ислом Каримов ва Президенти давлати меҳмонпазири Тоҷикистон Эмомалӣ Раҳмон ҷамъ омаданд.
Дар ҳамоиши сарони давлатҳои аъзои Созмони ҳамкории Шанхай ҳамчунин Президенти Ҷумҳурии Исломии Афғонистон Ҳомид Карзай, Президенти Ҷумҳурии Исломии Эрон Ҳасани Рӯҳонӣ ва Президенти Муғулистон Тсахиагийн Элбегдорж иштирок доранд. Ҳиндустонро дар саммит вазири корҳои хориҷӣ Сушма Свараҷ ва Покистонро мушовири Сарвазир оид ба масъалаҳои амнияти миллӣ ва сиёсати хориҷӣ Сартоҷ Азиз намояндагӣ мекунанд.
Дарвоқеъ, Душанбе шаҳри дӯстию рафоқат, ҳусни ҳамсоягӣ ва таконбахши ҳамкориҳо будани худро бори дигар дар амал собит месозад. Ба муносибати ташрифи меҳмонони олимақом кӯчаю хиёбонҳои пойтахти хушбоду ҳавои кишвари азизамон бо лавҳаю шиорҳои шодбошӣ ва навиштаҷоти маълумотӣ ороиш ёфта, барои истиқболи онҳо оғӯши гарми худро боз кардааст. Шаҳри Душанбе ҳамчунин ҷойи баргузории мулоқотҳои дуҷонибаи сарони давлатҳо ва дигар шахсони расмии воломақом гашт. Ҷаласаи навбатии Шӯрои сарони давлатҳои аъзои Созмони ҳамкории Шанхай дар бинои боҳашамати Кохи Наврӯз баргузор гашта истодааст.
Чаласаи навбатии Шӯрои сарони давлатҳо дар ҳайати хосса идома дорад. Ҷаласа бо сухани ифтитоҳии Раиси Шӯрои сарони давлатҳои аъзои Созмони ҳамкории Шанхай - Президенти Ҷумҳурии Тоҷикистон Эмомалӣ Раҳмон оғоз ёфт. Эмомалӣ Раҳмон меҳмонони олимақомро ба сарзамини файзбори Тоҷикистон хайрамақдам гуфта, ба ҷаласа кори пурсамар таманно намуд. Пас аз анҷоми ҷаласаи ҳайати хосса бо иштироки ҳайатҳои васеи давлатҳои аъзои Созмони ҳамкории Шанхай ва давлатҳои нозиру шарики мусоҳибавӣ ҷаласаи васеъ доир мегардад.
АМИТ «Ховар»
