Дар Душанбе тақвияти ҳамкории Тоҷикистон ва Корея дар соҳаи сайёҳӣ баррасӣ гардид
Тавсеаи ҳамкории Тоҷикистон ва Корея дар бахши сайёҳӣ зимни мулоқоти роҳбарияти Кумитаи рушди сайёҳии назди Ҳукумати Ҷумҳурии Тоҷикистон бо Сафири Фавқулода ва Мухтори Ҷумҳурии Корея дар Ҷумҳурии Тоҷикистон баррасӣ карда шуд. Дар ин хусус АМИТ «Ховар» бо истинод ба Кумитаи мазкур хабар медиҳад.
Дар мулоқот атрофи масъалаҳои густариши муносибатҳои дуҷониба дар соҳаи сайёҳӣ, омӯзиши таҷрибаи Корея ва ҷалби сармоягузорӣ дар ин самт табодули афкор сурат гирифт.
Роҳбарияти Кумита маълумот дод, ки дар партави дастгириҳои доимии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва сиёсати дарҳои кушоди Ҳукумати Ҷумҳурии Тоҷикистон имрӯз Тоҷикистон тамоми имкониятро дар самти рушди сайёҳӣ бо фароҳам овардани шароити мусоиди ҳуқуқӣ, содагардонии дастрасии раводид, роҳандозии низоми бераводид, додани имтиёз ба соҳибкорони ватанию хориҷӣ, паст намудани мизони андозбандӣ дар соҳаҳои бо сайёҳӣ омехта, тавсеаи ҳамкорӣ бо давлатҳои хориҷӣ дорад, то дилхоҳ меҳмону сайёҳи ба диёрамон омада бо таассуроти хотирмон саёҳат намояд.
Дар ҷараёни мулоқот ҷониби Корея пешниҳод намуд, ки барои муайян кардани самтҳои афзалиятноки рушди соҳаи сайёҳии Тоҷикистон ва шиносоии бештар бо таъриху фарҳанг, табиат, инфрасохтори сайёҳӣ ва намудҳои сайёҳӣ бояд гурӯҳи корӣ таъсис дода шуда, ба муддати як сол ин самтҳои асосӣ мавриди омӯзиш қарор гиранд.
Ҳамзамон вобаста ба ин муайян карда шавад, ки ба кадом самтҳои асосӣ таваҷҷуҳ зоҳир гардад. Ҳайати гурӯҳи корӣ бояд аз ҳисоби намояндагони мақомоти дахлдори самти сайёҳӣ ва ширкатҳои сайёҳии тарафҳо таъсис дода шавад.
Ҳамчунин масоили истифодаи самараноки беҳтарин таҷрибаҳои Корея оид ба пешбурди соҳаи сайёҳии мамлакат дар самти хизматрасонӣ ва ташкил намудани курсҳои омӯзишӣ дар соҳаи сайёҳӣ барои кормандони ин соҳа дар Ҷумҳурии Тоҷикистон ва мубодилаи сайёҳони байни ду давлат баррасӣ гардид.
Ҳамчунин тарафҳо ҳавасмандии худро барои ҳамкории судманд, мустаҳкам намудани дӯстӣ ва баланд бардоштани сатҳи иқтисодӣ дар рушди сайёҳӣ иброз доштанд.
