Кумитаи телевизион ва радиои назди Ҳукумати Ҷумҳурии Тоҷикистон Варақаи матбуотӣ (26.07.2023)

Кумитаи телевизион ва радиои назди Ҳукумати Ҷумҳурии Тоҷикистон фаъолияти худро дар нимсолаи аввали соли 2023 дар асоси талаботи Конститутсияи Ҷумҳурии Тоҷикистон, амру фармон ва дастуру ҳидоятҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, қонунҳои Ҷумҳурии Тоҷикистон, қарорҳои Ҳукумати Ҷумҳурии Тоҷикистон, Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон аз 23-декабри соли 2022 «Дар бораи самтҳои сиёсати дохилӣ ва хориҷии Ҷумҳурии Тоҷикистон» ва дигар санадҳои меъёрии ҳуқуқӣ ба роҳ монда дар доираи дастуру супоришҳо Нақшаи чорабиниҳои Кумита оид ба амалӣ намудани он ва инчунин Нақшаи кории Кумита барои нимсолаи аввали соли 2023 иборат аз 146 банд таҳия ва татбиқ гардиданд.

Дар нимсолаи аввали соли 2023 аз ҷониби шабакаҳои давлатии телевизион ва радио сафарҳои дохилию хориҷӣ, вохўриву мулоқотҳои Президенти Ҷумҳурии Тоҷикистон муҳтарам Эмомалӣ Раҳмон бо сокинони мамлакат, намояндагони кишварҳои хориҷӣ ва ташкилоту созмонҳои байналмилалию  минтақавӣ  сари вақт инъикоси худро ёфтанд.

Дар ин давра доир ба нуктаҳои Паём (23.12.2022),  “Соли байналмилалии ҳифзи пиряхҳо”эълон шудани соли 2025, “Солҳои рушди саноат”, ташаббусҳои байналмилалии  Тоҷикистон, омодагиҳо ба ҷашни  35-солагии Истиқлолияти давлатии Ҷумҳурии Тоҷикистон, ҷашну рўзҳои таърихӣ ва дигар чорабиниҳои сатҳи ҷумҳуриявӣ,  минтақавӣ ва байналмилалӣ тавассути барномаҳои иттилоотӣ шарҳу гузоришҳои саривақтӣ таҳия ва пахш карда шуд.

Дар барномаҳои гуногун тибқи формат бо иштироки олимону  мутахассисон ва намояндагони қишрҳои гуногуни ҷомеа мавзуъҳои истиқлолияти давлатӣ, ватандўстӣ, тақвияти худшиносиву худогоҳӣ, хизмати ҳарбӣ, ҳифзи муҳити зист, риояи меъёрҳои забони давлатӣ, аҳамияти озмунҳои ҷумҳуриявӣ, фарҳанги миллӣ, одоби муошират ва фарҳанги шаҳрнишинӣ мунтазам баррасӣ карда шуданд.

Масъалаҳои гуногуни соҳаҳои  иқтисоду саноат,  меъморӣ, сохтмону коммуникатсия ва кишоварзӣ дар  барномаҳои матраҳ карда шуда, рафти баргузории озмунҳои ҷумҳуриявии “Фурўғи субҳи доноӣ китоб аст”, “Тоҷикистон - Ватани азизи ман”, “Илм - фурўғи маърифат”, “Тоҷикон” - оинаи таърихи миллат” мунтазам сабт ва инъикос намуд. Фестивалҳои ҷумҳуриявии  “Сайри гули лола”, “Сад ранги чакан” ва “Тоҷикона мепўшем”, ки дар тарбияи маънавии аҳли ҷомеа, бахусус наврасону ҷавонон нақши бориз мегузоранд, аз мадди назари аҳли эҷод дур намонда буданд.

Бо мақсади дар сатҳи баланд таҳия ва пешниҳод намудани барномаҳои калонҳаҷм ва филмҳои мустанаду ҳуҷҷатӣ, ҳамчунин, таҳкими корҳои техникӣ дар назди Кумита шўроҳои бадеӣ, таҳрирӣ ва техникӣ таъсис дода шудааст, ки роҳбарии онҳоро муовини якум ва муовинони раиси Кумита ба ӯҳда доранд.

Шуроҳои бадеӣ ва таҳририяи Кумита дар давраи ҳисоботӣ 127 барномаи калонҳаҷми телевизиониву радиоӣ, филмҳои мустанад, инчунин 52 ролику лавҳаи навро, ки аз ҷониби ҳайатҳои эҷодию техникии шабакаҳои телевизиону радиои Кумита бахшида ба ҷашнҳои милливу давлатӣ, аз ҷумла ба муносибати ҷашни Сада, 30-солагии Қувваҳои Мусаллаҳи Ҷумҳурии Тоҷикистон, Рўзи Модар, Ҷашни байналмилалии Наврўз, Рўзи Шашмақом, Рўзи ҷавонони Тоҷикистон, ҷашни Тиргон, Рўзи Ваҳдати миллӣ ва ҷашну чорабиниҳои дигари ҷумҳуриявию байналмилалӣ пешниҳод гардида буд, баррасӣ намуда, такмил дод.

Тавре маълум аст, дар соҳаи телевизион ва радио айни замон ду барномаи муҳими давлатӣ – “Барномаи давлатии рушди телевизион  ва радио дар Ҷумҳурии Тоҷикистон барои солҳои 2021-2025” ва “Барномаи давлатии рушди пахши телевизони рақамӣ дар Ҷумҳурии Тоҷикистон барои солҳои 2020-2024” татбиқ мегардад. Дар доираи банди 1-и Барномаи давлатии рушди телевизион  ва радио дар Ҷумҳурии Тоҷикистон барои солҳои 2021-2025 вобаста ба омода намудани журналистони барномаҳои муаллифӣ, рўзноманигорони соҳавӣ ва сенариянависон Муассисаи давлатии “Академияи воситаҳои ахбори оммаи Тоҷикистон” дар шашмоҳаи якуми соли 2023 барои кормандони шабакаҳои телевизион, радио ва матбуоти даврии ҷумҳурӣ, дар маҷмўъ, 12 машғулияти омўзишӣ баргузор намудааст. Дар ин машғулиятҳо  беш аз 200 нафар кормандони шабакаҳои телевизионӣ, радиоӣ ва нашрияҳои даврии кишвар иштирок намуда, ба 158 нафари инҳо сертификати муассиса супорида шудааст, ки аз ин ҷумла 33 сертификат соҳавӣ мебошад

Дар доираи дастуру супоришҳои Пешвои миллат ҷиҳати баланд бардоштани тарбияи фарҳангии ҷомеа, ҷалби васеи ҳаҷвнигорону ширинкорон, дастгирии ҷавонони соҳибистеъдод, пайдо кардани гурўҳҳои нави ҳаҷвӣ,  ташаккул додани раванди вусъати неруи эҷодӣ, фароҳам овардани имкониятҳои густурдаи инкишоф барои  жанрҳои ҳаҷвӣ дар шабакаи ТВ Тоҷикистон шоу-озмуни ҷумҳуриявӣ-телевизионии “Тамошо” ташкил карда шуд, ки то имрўз 15 нашри он пахш шуда, дар онҳо ҳаваскорон ва гурўҳҳои касбӣ   аз  шаҳру ноҳияҳои мамлакат иштирок намуда, маҳорату истеъдоди худро пешниҳоди доварон гардониданд.

Ҳамзамон, вобаста ба дастгирии давлатии ҷавонон, имконияти муосир барои илмомўзии наврасону ҷавонон, фарҳанги оиладорӣ, эҳтироми калонсолон, омўзиши илмҳои дақиқ, табиатшиносӣ ва риёзӣ, арҷгузорӣ ба арзишҳои миллию давлатӣ, рў овардан ба суннату оинҳои қадимаи ниёгон, гиромидошти муқаддасоти миллӣ ва  пешгирии ҷавонон аз шомилшавӣ ба ҳизбу ҳаракатҳои тундраву тахрибкор мусоҳибаву суҳбатҳои тахассусии мутахассисони соҳаҳои дахлдор пешниҳоди тамошобинону шунавандагон  гардонида шуд.

Аз 19 то 26 марти соли равон бахшида ба ҷашни Наврўзи байналмилалӣ аз ҷониби ҳайати эҷодию техникии ТВ Сафина беш аз 25 барномаи идона аз ҷумла, барномаҳои “Шогун баҳор муборак”, “Паёми хуршед”, “Наврўзи ноз”, “Суманак”, “Ҳавасрезаҳо”, “Ганҷур”, “Навои Наврўз”, “Наврўзи хуҷастапай”, “Фазо”, “Баҳори Ёвон”, “Наврўзи Кўлоб”, “Башорати Наврўз”, “Сафои Наврўз”, “Муждаи Наврўз”, “Пайки баҳор”, “Навои Наврўз”, “Наврўзи Ваҳдат” ва “Наврўзи Ҳисор” бо давомнокии 24 соат пешниҳоди бинандагон гардиданд.

Вобаста ба Стратегияи омўзиш ва рушди фанҳои риёзӣ, дақиқ ва табиӣ дар соҳаи илму маориф дар давраи то соли 2030 дар ТВ Баҳористон озмунҳои телевизионии «Интеллект», «Заковат», «Таҷриба», «Бо ҳам меёбем!» ва «Донояк» роҳандозӣ гардид, ки мақсад аз таҳияи ин гуна барномаҳо пайдо намудани  кўдакону наврасони қобилиятнок, мусоидат ба болоравии сатҳи дониш, дўстии наврасони минтақаҳои гуногуни  ҷумҳурӣ ва мустаҳкам намудани ҳамкории онҳо, афзун намудани рағбат ба дониш мебошад. Ҳамзамон, ҷиҳати  омўзиши илмҳои дақиқ 20 шумораи намоиши «Асрори замину замон» дар ҳаҷми 250 дақиқа аз забонҳои дигар тарҷума ва дубляж карда шуд. Дар  давраи ҳисоботӣ  муассиса  9 филми тасвирӣ, 8 филми бадеӣ ва беш  аз 50 филми  тасвирии  кўтоҳҳаҷми  омўзиширо ба забони тоҷикӣ  баргардон ва пахш намуд. 

Муассисаи давлатии ТВ «Ҷаҳоннамо» дар шашмоҳаи аввали соли равон муҳимтарин рўйдодҳои дохил ва ҷаҳонро бо зиёда аз 4 350 нашр ва беш аз 31 000 гузориш тавассути нашри иттилооти «Хабар» инъикос намуд. Аз тариқи бахши «Дунё» беш аз 57 900 хабарҳои хориҷӣ омодаву пешниҳод гардид. Дар ин давра 24 барномаи ҷамъбастии «7 рўз» бо мавзуъҳои муҳими дохилу хориҷии ҳафтаи ҷаҳон, бо таҷдиди назар, бо тарзу таҳлили тоза бо забонҳои тоҷикӣ, русӣ ва англисӣ таҳия ва нашр шуданд. 

 Дар ин давра, дар умум, аз ҷониби гурўҳи эҷодии идора беш аз 200 барномаи таҳлилӣ таҳти унвони «Геополитика», «Дидгоҳ», «Мерос», «Ҷаҳони иртибот», «Сӯҳбати рўз», «Ояндасоз», «Масири рушд», «Маориф ва илм», «Тандурустӣ» ва «Назари хос» оид ба самтҳои гуногуни сиёсати дохиливу хориҷӣ, татбиқи ҳадафҳои стратегӣ, ислоҳоти соҳаи маорифу тандурустӣ, дастгирии соҳибкорӣ, татбиқи қонунҳои миллӣ, мубориза бо терроризму экстремизм, ифротгароӣ, инчунин, тарғибу ташвиқи ташаббусҳои байналмилалии Ҷумҳурии Тоҷикистон оид ба обу иқлим, ҳимояи ҳуқуқи шаҳрвандон ва дигар мавзуъҳои рўзмарра таҳия ва пахш карда шудааст. 

Телевизиони Синамо дар шашмоҳаи аввали соли равон 44 филми гуногунжанр таҳия намуд, ки ин шумораро 1 филми ҳунарии кўтоҳ, 34 филми мустанад, 2 филм-консерт ва 7 филми тасвирӣ ташкил менамояд. Муассисаи давлатии телевизиони “Синамо”  дар давраи ҳисоботӣ, инчунин, 27 филми гуногунжанри хориҷиро, ки дорои мазмуну муҳтавои баланд мебошанд, бо забони тоҷикӣ тарҷума ва пахш намуд, ки ин шумораро 4 силсилафилми бадеӣ, 6 силсилафилми мустанад, 5 филми мустанад, 4 филми ҳунарӣ ва 8 филми илмӣ-оммавӣ  тавассути зерхат (субтитр) ташкил медиҳад.

Дар давраи ҳисоботӣ тамоми чорабиниҳои варзишии кишвар ва байналмилалӣ дар телевизиони “Варзиш” ба таври зарурӣ тавассути барномаи иттилоотии “Хабар” ва дигар барномаҳо мустақиман ва бо сабту бандубаст  инъикос ёфтанд. Аз 1 марти соли 2023 телевизиони “Варзиш” нашри англисии барномаи “Хабар”-ро ба роҳ монд ва он ҳамарӯза соати 15:30 пешкаши тамошобинон гардонида мешавад.

Бунгоҳҳои хабарии телевизиони “Варзиш” дар минтақаҳои ҷумҳурӣ дар як моҳ аз 15 то 30 хабари варзиширо пешниҳоди мухлисон менамоянд. Дар шашмоҳаи аввали сол муассиса аз ҷараёни баргузории чемпионатҳои Тоҷикистон оид ба гўштини юнону румӣ ва тарзи озод, ҷудо, бокс ва гўштини миллӣ миёни калонсолон  шарҳу гузоришҳоро ба таври муфассал ва мустақиман пешкаши мухлисони варзиш намуд. Дар баробари фарогирии мусобиқоти дохилӣ дар эфири телевизиони “Варзиш” пахши мустақим ва ғайримустақими чемпионатҳои қораи Аврупо, аз қабили Ла Лигаи Испания, Серияи А-и Италия, Премйер Лигаи Англия, Бундеслигаи Олмон ва Лигаи 1-и Фаронса ба роҳ монда шуд. Мавсими ғайриоддии Лигаи қаҳрамонҳои Аврупо ва Лигаи Аврупо низ пешкаши мухлис гардонида шуд. Силсиламусобиқоти Федератсияи байналмилалии ҷудо моҳе то ду маротиба аз кишварҳои мухталифи сайёра мустақиман пешкаши ҳаводорони гўштини ҷудо шуданд. Ҳар ҳафта аз 2 то 4 маротиба рақобатҳои баскетбол аз мусобиқоти Лигаи баскетболи миллии Амрико (НБА), 3-4 рақобат аз мусобиқаи Лигаи миллии хоккей (НХЛ)-и Амрико мустақиман саҳаргоҳон бо забони тоҷикӣ шарҳ дода мешаванд.

Инчунин, бори нахуст Чемпионати ҷаҳон оид ба таэквондо ВТФ ба мухлисон манзур гардид. Рўйдоди таърихии дигар баргузории мусобиқаи Гран-Прии ҷудо дар шаҳри Душанбе буд, ки сабқатҳои серўза пурра бо сифати баланд инъикоси худро пайдо намуданд.

Навгонии дигар инъикоси рақобатҳои ҷолиби “Шоми бокс”-и тимҳои мунтахаби Тоҷикистону Ўзбекистон, мусобиқаи нахустини байналмилалии қаиқронӣ ва парапланеризм дар Тоҷикистон мебошад, ки ин мусобиқаҳо низ дар эфири шабака саривақт ва бо сифати хуб пахш гардиданд.

МД ТВ “Илм ва табиат” дар давраи ҳисоботӣ дар самти тарғибу ташвиқи дастовардҳои илмии олимони дохил ва хориҷи мамлакат, навоварону ихтироъкорон, олами набототу ҳайвоноти Тоҷикистону ҷаҳон, тарғиби омўзиши илмҳои риёзиву табиатшиносӣ, тағйирёбии иқлим ва таъсири он ба муҳити зист, ҳамчунин табиати нотакрору зебои минтақаҳои гуногуни кишварамон ва дигар мавзуъҳои мувофиқ ба формати пахш барномаҳо таҳия ва пешниҳод намуд.

Дар давраи ҳисоботӣ барномаҳои «Теғи Сино» оид ба масъалаҳои марбут ба соҳаи тиб, «Арши илм» доир ба ҳаёт ва фаъолияти олимону тадқиқотгарони сатҳи ҷаҳонӣ ва ватанӣ, «Сайри кайҳон» оид ба олами коинот, «Дар дили санг» дар бораи таркиби сангҳою минералҳо, «Китоби сурхи Тоҷикистон» оид ба ҳайвоноти нодири кишварамон, «Инсон» дар бораи анатомияи одам, «Суфраи табиат» вобаста ба тарзи истифода ва истеъмоли дурусти сабзавоту мева, «Чӣ тавр сохта шудааст?» оид ба тарзи истеҳсоли таҷҳизот, асбобу анҷоми рўзғор ва маҳсулоти ғизоӣ, “Ҷадвали даврии Менделеев” (10 барнома) дар бораи унсурҳои кимиёвӣ аз рўи ҷадвали олим Дмитрий Менделеев, “Чаманистон” ва даҳҳо барномаҳои дигар пахш гардиданд. 

Дар давраи ҳисоботӣ намоишҳои «Дар оғўши табиат» (55 барнома), «Шифохонаи табиат» (26 барнома) мунтазам таҳия гардиданд, ки оид ба табиати Тоҷикистону хориҷи он, гулу гиёҳ ва буттаҳои табобатӣ, хусусияти онҳо ва тарзи дурусти истифодаи онҳо маълумот медиҳанд. 

Дар ин давра 76 нашри барномаи «Ҷилои дониш» дар ҳамкорӣ бо Вазорати маориф ва илми Ҷумҳурии Тоҷикистон ва факултаҳои химия ва физикаи Донишгоҳи миллии Тоҷикистон таҳия ва пахш гардид, ки дар он омўзгорон машғулиятҳои назариявӣ ва амалиро пешниҳоди бинандагон гардониданд.

Дар давраи ҳисоботӣ  10 филми мустанади телевизионии илмию табиӣ таҳия ва 92 филми мустанади хориҷӣ тарҷума ва дубляж карда шуд.

Телевизиони “Шаҳнавоз” дар давраи ҳисоботӣ барномаҳои  муаллифии “Истеъдод”, «Набзи наво», «Хостаҳо», «Шаҳдрез», «Тоҷикистон - Ватани азизи ман», “Дар олами савту наво”, “Музыкальная  шкатулка», “Ҷилои ҳунар”, “Тараннуми Ватан”,“Меҳмони Шаҳнавоз”,  “Хушзеҳн” “Шаббода”, “Рози наво”, “Набзи наво”, “Даргоҳи ҳунар”, “Дурахшон”, “Файзи истиқлол”, “Мондагор” ва барномаи субҳгоҳии “Насими субҳ”-ро пайваста таҳия ва пешниҳоди бинандагон гардонд.

Бахшида ба Рўзи таъсисёбии Артиши миллии Ҷумҳурии Тоҷикистон  барномаҳои «Ҳомиёни Ватан», «Далерон» ва роликҳо дар мавзуи худшиносиву худогоҳии ҷавонон,  ҳамзамон барномаҳои рангини  консертӣ бо иштироки сарбозону афсарон пешниҳод гардиданд.

Ба ифтихори Рўзи Модар шуруъ аз 1-ум то 20-уми феврал лоиҳа-озмуни телевизионии «Суруди Модар» роҳандозӣ гардид, ки  беҳтаринҳо ба даври ҷамъбастӣ роҳ ёфтанд ва рўзи 6 март дар толори “Кохи Суруш” даври ниҳоии ин озмун дар сатҳи баланд баргузор гардида, ғолибон қадрдонӣ шуданд. Шакли пурраи баргузории озмуни «Суруди Модар» пахш гардид.

Дар рўзҳои таҷлили ҷашни байналмилалии Наврўз, дар баробари суруду таронаҳои баҳору наврўзӣ барномаҳои муаллифӣ зери унвони «Навои Наврўз», «Тоҷикистон – Ватани Наврўз аст»,  «Наврўзи оламафрўз» ва  андешаҳои олимону донишмандон, шоирону муҳақкиқон дар бораи ҷаҳонишавии Наврўз, қироати шеърҳо дар васфи Наврўз аз ҷониби ҷавонон пахш  гардиданд. Инчунин, барномаҳои “Набзи наво”, “Шаҳдрез” ва “Меҳмони Шаҳнавоз” бахшида ба ҷашни байналмилалии Наврўз таҳия ва пахш гардиданд. Бахшида ба Рўзи Пойтахт, Рўзи Шашмақом, Рўзи ҷавонон ва ҷашни Ваҳдати миллӣ барномаҳои ҷолиб омода ва пешниҳод карда шуд.

Шуруъ аз аз моҳи апрели соли равон дар телевизиони “Шаҳнавоз” чор лоиҳаи нави телевизионӣ, аз қабили “Ангора”, “Ситораи ҷаҳон” , “Чеҳра” ва “Пайғом” рўйи кор омаданд.

Телевизиони “Сайёҳӣ ва ҳунарҳои мардумӣ” барои бинандагон барномаву намоишҳои иттилоотӣ, маърифатӣ, фарҳангию фароғатӣ, ролику лавҳаҳои тарғиботии инъикоскунандаи бахши сайёҳию ҳунармандиро зери унвонҳои “Вожазори сайёҳӣ”, “Вожазори ҳунар”, барномаҳои иттилоотии “Паём”, “Вести”, “News”, “Тақвим”, “Армуғон”, “Нигористон”, “Раҳ ба раҳ”, “Гулдаст”, “Рўзномаи сайёҳ”, “Гардиш”, “Раванд”, “По ту сторону экрана”, “Рози соз”, “Нигоҳи сайёҳ”, “Диёр”, “Шабонгаҳ”, “Соҳибҳунар”, “Ривоят ё ҳақиқат”, “Аз аҳди бостон”, “Шоми Душанбе”, “Эъҷоз”, “Эҷод””, “Дастони моҳир”, “Рози таърих”, “Зиннати ҳар хон”, “Зиннатафзо”, “Мўд”, “Меҳмонхона”, “Тарабхона”, “Сайёҳии варзишӣ”, “Экотуризм”, “Агротуризм” ва ғайра пайваста таҳия ва менамояд.

Дар баробари ин намоишҳои нави “Дурнамо”, “Мактаби сайёҳӣ”, “Мусаввир”, “Лаззати табиат”, “Кўҳнавардӣ”, “Саёҳат ва солимӣ”, “Сафои Хатлон” дар шабака рўйи кор оварда шуданд.

Ба хотири робитаи мустақим бо тамошобин, ҷалби ҳарчи бештари бинандагон, тарғиби мавзеъҳои сайёҳии мамлакат, шаҳру деҳот, кўчаю маҳаллаҳои ороста, ташвиқи кори хизматрасонӣ дар тарабхона, чойхонаю қаҳвахонаҳо телевизиони “Сайёҳӣ ва ҳунарҳои мардумӣ” озмунҳои телевизионии “Сарзамини ман” (аксҳои беҳтарини мухлисон дар фасли зимистон аз мавзеъҳои сайёҳӣ, шаҳру деҳот, маҳаллаю кўча), “Рақобат” (кори тарабхонаҳо, чойхонаҳо, ошхонаю қаҳвахонаҳо кори таббохону пешхизматон,  сатҳи хизматрасонӣ ва дигар масъалаҳои марбут ба кори тарабхона ва кормандони онҳо), “Армуғон” (маҳсули дасти ҳунармандон ба шакли туҳфа ва армуғонҳо) ва “Чашмандоз” (манзараҳои зебои гўшаю канори мамлакат)-ро таъсис дод, ки дар он тамошобинон ва кормандони соҳаҳои марбут фаъолона ширкат варзида, ғолибон сазовори диплом, мукофоти пулӣ ва туҳфаҳои хотиравӣ гардиданд.

Бо мақсади муаррифӣ намудани мавзеъҳои сайёҳӣ, манзараҳои зебои Тоҷикистон, роҳҳои дуруст омода намудани хўрок дар табиат, риояи талаботи ҳифзи муҳити зист зимни саёҳат ва ҳамчунин тарғиби истеҳсолоти ватанӣ барномаи “Лаззати табиат”роҳандозӣ шуд.

Барномаи “Шаҳри орзуҳо” барои муаррифии имкониятҳои сайёҳӣ ва шароити мавҷуда дар иншооти хизматрасонии пойтахти мамлакат шаҳри Душанбе роҳандозӣ гардидааст. Дар ин давра 5 шумораи барнома аз боғҳои фарҳангӣ-фароғатии ба номи Алишери Навоӣ, Абулқосим Фирдавсӣ, Садриддин Айнӣ, Боғи Ирам ва Театри давлатии академии опера ва балети ба номи Садриддин Айнӣ манзури бинандагон карда шуд.  

Дар  соли 2023 самти фаъолияти мухбирони минатақавии вилояти Хатлон ҷоннок гардид.  Аввалан, лоиҳаи “Сафои Хатлон” роҳандозӣ шуд ва ҳар ҳафта ду маротиба дар он самти сайёҳӣ ва ҳунармандии вилояти Хатлон таҳлилу баррасӣ мешавад. Ҳамзамон дар давраи ҳисоботӣ дар минтақаи Кўлоб намояндагии  телевизион ба кор оғоз кард ва руйдодҳои вобаста ба самти сайёҳӣ ва ҳунармандиро  аз ин минтақа пайваста инъикос менамоянд.

Радиои Тоҷикистон, шабакаҳои радиоии «Овози тоҷик», «Садои Душанбе» ва «Фарҳанг» дар давраи ҳисоботӣ беш аз 5 040 барнома ва тариқи 5 687 нашри иттиллоотӣ 35 660 хабару гузориш (Радиои Тоҷикистон-1 951 барнома ва 13 500 хабару гузориш, “Садои Душанбе”-950 барнома ва 9 000 хабару гузориш, “Фарҳанг”- 740 барнома ва 5 160 хабару гузориш ва “Овози тоҷик”-1 400 барнома ва 8 000 хабару гузориш)-ро тақдими шунавандагон намуданд.

Дар ҳошияи тарғиби сиёсати Ҳукумати Ҷумҳурии Тоҷикистон аз ҷониби кормандони шабакаи «Садои Душанбе» тариқи 1500 нашри иттиллоотӣ зиёда аз 9000 хабару гузориш ва 950 гуфтору барнома таҳия гардид. Дар ин давра тамоми чорабиниҳои сиёсӣ, сафарҳои кории Пешвои миллат муҳтарам Эмомалӣ Раҳмон ба шаҳру навоҳии кишвар, амалигардии стратегияву барномаҳои давлатӣ, ташаббусҳои сатҳи ҷаҳонӣ, аз ҷумла Даҳсолаи байналмилалии амал «Об барои рушди устувор, солҳои 2018-2028», «Бистсолаи омўзиш ва рушди фанҳои табиатшиносӣ, дақиқ ва риёзӣ дар соҳаи илму маориф»,  «Солҳои рушди саноат», омодагиҳо ба 35-солагии Истиқлолияти давлатии Ҷумҳурии Тоҷикистон дар баробари инъикоси вазъи кунунии фарҳангию иҷтимоии мамлакат дар меҳвари барномаҳо қарор дошт. Вобаста ба тамоми чорабиниҳое, ки дар давоми шаш моҳи соли равон дар кишвар таҷлил карда шуд, аҳли эҷодию техникии радиои «Садои Душанбе» зиёда аз 60-ролики тарғиботӣ омода ва пешниҳоди шунаванда гардонид.

Ҳайати эҷодии радиои «Фарҳанг» дар давраи ҳисоботӣ беш аз 740 барнома ва тариқи 736 нашри хабарӣ 5 160 хабару гузориш таҳия намуданд. Дар давраи ҳисоботӣ тариқи шабакаи «Фарҳанг» вобаста ба санаҳои муҳими давлатдорӣ ва ҷашни миллӣ барномаҳои идона таҳти унвони «Сада пайғоми баҳор», «Гетиафрўз» ва «Оинаи наврўзӣ» таҳия гардид. Рўзи Шашмақом дар гуфторҳои «Марворид», «Ҷилои хуршед», «Ватани мо - Тоҷикистон», «Пайванд» ва «Ҳамболи шашмақом», Рўзи ҷавонон дар гуфторҳои «Пайванд» «Фарҳанги рўз» ва «Ватани мо - Тоҷикистон», Рўзи пойтахт бошад, дар гуфторҳои «Пайванд», «Оинадори нур», «Фарҳанги рўз» ва «Фарҳанги завқ» тарғиб карда шуд.

Дар меҳвари барномаҳои шабакаи “Овози тоҷик” дар ин давра нуктаҳои Паёми Президенти Ҷумҳурии Тоҷикистон, дастовардҳои солҳои соҳибистиқлолии кишвар, сафарҳои кории Президенти Ҷумҳурии Тоҷикистон ба шаҳру навоҳии ҷумҳурӣ, сафарҳои расмии шахсиятҳои аввали мамолики хориҷӣ, нишасту конфронсҳои байналмилалӣ, вусъати корҳои ободонию бунёдкорӣ ва рушди деҳот, сайёҳӣ, амалишавии Даҳсолаи байналмилалии амал «Об барои рушди устувор, солҳои 2018-2028», эълон гардидани соли 2025 ҳамчун Соли байналмилалии ҳифзи пиряхҳо қарор дошт. Ҳамзамон, бахшида ба рўзи Артиши миллӣ, барномаи идона таҳти унвони «Сипоҳиёни  Ватан» дар се нашр аз бахшҳои тоҷикиву русӣ, дар иртибот ба Рўзи Модар барномаи идонаи «Зиндагиафрўз» аз бахшҳои тоҷикӣ ва форсӣ ва оид ба ҷашни байналмилалии Наврўз таҳти унвони «Лабханди табиат» силсилабарномаҳо ва тафсиру роликҳо аз тамоми бахшҳои шабака садо доданд.

Дар Радиои Тоҷикистон ва шабакаҳои он дар нимсолаи аввали соли 2023 барномаҳои нав, аз қабили «Рўҳафзо», «Пайраҳаи эҷод»,   «Пайрав», «Хушнаво», «Равондармонӣ», «Биё -биё, хобаки ширини мо», «Ҳафт рўзи Душанбе», «Хирмани роз» ва «Мушоҳида» рўйи кор омаданд, ки барои беҳтар кардани сифати барномаҳо ва аз байн бурдани такроршавии муҳтавои барномаҳо мусоидат карданд.

Бо мақсади беҳтарсозии заминаҳои техникӣ Маркази техникии телевизион ва радиои ҷумҳуриявӣ барои наворбардорони «Телевизиони Тоҷикистон»  4 видеокамераи наворбардории тамғаи Sony PXW –Z190, 2 микрофон Sennheiser EW 112, 2 таҷҳизоти равшанидиҳӣ барои камера, таҷҳизоти қувватдиҳанда ва флешкартаҳои гуногунғунҷоиш харидорӣ шуданд.

Тибқи нақша-чорабиниҳои маркази техникӣ 5 танзимгоҳи иловагӣ бо дастрасии таҷҳизоти муосири соҳави мавриди истифода қарор дода шуд. Бо ин мақсад ҷиҳати сари вақт ва бо сифати баланд танзим намудани барномаҳо ҳангоми сафарҳои хизматӣ 3 нотбуки пуриқтидор барои таъсиси танзимгоҳҳои сайёр дастрас карда шуд.

Бо мақсади сари вақт сабт ва инъикос намудани ҷашну идҳои миллию давлатӣ ва анҷом додани сафарҳои хизматӣ барои сехи нақлиётӣ 1 автомашинаи сабукрав ва 1 автомашинаи боркаш дастрас гардида, харидории қисмҳои эҳтиётӣ ба анҷом расонида шуд.

Ҳамчунин дар ин давра студияи таълимии телевиизонии факултети журналистикаи “Телевизиони ДМТ” Донишгоҳи миллии Тоҷикистон бо дастгоҳу таҷҳизоти зарурӣ таъмин ва барои истифодабарӣ ба донишҷӯён вогузор карда шуд.

Ҷамъияти саҳомии кушодаи «Телерадиоком» бо мақсади беҳтар намудани фарогирӣ ва пахши барномаҳои телевизион ва радиои давлатӣ дар шаҳру ноҳияҳои ҷумҳурӣ дар доираи татбиқи марҳилаи 4-уми «Барномаи давлатии рушди пахши телевизиони рақамӣ дар Ҷумҳурии Тоҷикистон барои солҳои 2020-2024» корҳои омодагиву таъмири бинои техникӣ ва хати барқ дар макони насби фиристандаҳои рақамӣ дар маҳалҳои Ҳоити ноҳияи Рашт, Чуҷалии шаҳри Ҳисор, Гулхаси шаҳри Турсунзода, Мотравни ноҳияи Ванҷ, Шитам ва Сохчарви ноҳияи Шуғнон, Шикуши ноҳияи Роштқалъа, Ганҷинаи ноҳияи Хуросон, Даштиҷум ва Порвори ноҳияи Шамсиддин Шоҳин анҷом дода шуданд. Дар баробари ин, корҳои омодагӣ дар деҳаҳои Ғеш ва Дашти Ар-ари ноҳияи Муъминобод, Миёнаду ва Чилдараи ноҳияи Сангвор, Лаккони шаҳри Исфара бо маром идома дорад.

Дар доираи Барнома омода намудани 12 адад манора бо баландии аз 12 м то 18 м вобаста ба минтақаи ҷойгиршавии истгоҳҳои радиотелевизионии шаҳру ноҳияҳои вилояти Суғд ва Вилояти Мухтори Кўҳистони Бадахшон  корҳои васлу кафшергарӣ  оғоз гардидааст.

Иҷроиши марҳилаи 4-уми «Барномаи давлатии рушди пахши телевизиони рақамӣ дар Ҷумҳурии Тоҷикистон барои солҳои 2020-2024», ки насби 30 фиристандаи рақамиро дар назар дорад, то охири соли 2023 ба анҷом расида, он имкон медиҳад, ки фарогирии аҳолӣ дар ҷумҳурӣ бо пахши рақамӣ ба 83% расонида шавад.

Дар давраи ҳисоботӣ дар якҷоягӣ бо Мақомоти иҷроияи ҳокимияти давлатии вилояти Хатлон телевизиони “Хатлон” баъди насби таҷҳизоти муосири мувофиқ ба пахши рақамии дақиқияташ баланди HD гузаронида шуд.

Сохторҳои Кумита ба рушди воситаҳои дигари электронии иттилоотӣ низ таваҷҷӯҳи хоса зоҳир менамояд. Айнизамон 18 сохтори Кумита сомонаи расмӣ ва дар шабакаҳои иҷтимоӣ (Фейсбук, Инстаграмм, Телеграм) саҳифаҳои худро дошта, доир ба фаъолияти сохтор, навгониҳои муҳими дохил ва хориҷи кишвар мувофиқи формати шабака мавод ҷойгир менамоянд.

Аз ҷониби дастаҳои ҳунарии Кумита дар нимсолаи якуми соли 2023 28 барномаи консертӣ-телевизионии бахшида ба чорабиниҳои таърихиву фарҳангӣ таҳия ва ба навор гирифта шуда, таълимгирандагони Мактаби бачагонаи рақсии кўдаконаи «Меҳрона» 5 барномаи телевизиониро сабт намуданд. Ҳамзамон, 2 барномаи фарҳангӣ барои кормандони НБО “Роғун”, барномаи фарҳангӣ барои таълимгирандагони мактаб-интернати кўдакони ятим  ва як барномаи фарҳангӣ барои сарбозони яке аз қисмҳои низомии мамлакат намоиш дода шуд.

Қобили зикри хос аст, ки ҳунармандони Кумита рўзҳои 21-24 марти соли 2023 дар қароргоҳи Созмони Милали Муттаҳид дар шаҳри Ню-Йорк дар конфронс ва барномаи махсуси фарҳангӣ зери унвони «Об ва Наврўз - ду сарчашмаи ҳаёти башар», ки бо иштироки сарони давлатҳои ҷаҳон баргузор гардид, бо 2 барномаи консертӣ ҳунарнамоӣ намуданд.

Дастпарварони Мактаби бачагонаи рақсии кўдаконаи «Меҳрона» дар 3 –юмин Фестивали байналмилалии эҷодиёти бадеии кӯдакону наврасон ҷойи ифтихории дуюмро ишғол намуданд.

Дар умум, дар давраи ҳисоботӣ аз ҷониби ҳунармандони Кумита 139 суруду оҳанг сабт гардида, 20 рақс саҳнавӣ гардонда шудааст.

Дар давоми шаш моҳи сипаришуда аз тарафи идораҳои “Телевизиони Тоҷикистон” ба хазинаи навори  видеоӣ  ва филмҳои  Бойгонии Кумита беш аз 709 маводи телевизионӣ, ки аз барнома, филмҳои мустанад ва намоишномаҳои идона иборат мебошанд, барои нигаҳдорӣ пешниҳод шудааст.

Дар шаш моҳ маводи 744 фитта аз формати SP ба рақамӣ (ба компютер) баргардонида шуд. Феҳристи 940 маводи телевизионӣ тартиб дода шуда, ба феҳристи 501 мавод ислоҳ ворид карда шуд. Дар хазина дар формати VHS 462 фитта нигаҳдорӣ мешавад ва дар давоми шаш моҳи сипаришуда маводи бештар аз 454 фитта ба рақамӣ баргардонида шуд, ки 1 132 соат маводи хазинавиро дар бар мегирад.

Ҳамчунин, дар давоми шаш моҳ бештар аз 25 филми мустанад, 14 филми ҳунарӣ ва 13 барномаи телевизионӣ ба компютер баргардон шудааст. Гурўҳи тармим ва барқарорсозии маводи хазина дар давоми шаш моҳ 20 фиттаи суруду оҳангҳои хазинаи сабти овозро бо ғунҷоиши 2 442 суруду оҳанг, ки дар давраҳои гузашта бо камбудиҳои техникӣ, таҳрифи садоҳои мусиқӣ, нуқсонҳои акустикӣ сабт шуда буданд, бо риояи меъёрҳои муайяни техникӣ-бадеӣ коркард ва барқарор намуданд. Дар маҷмўъ, наздики 160 диск бо ғунҷоиши 17 453 суруду мусиқӣ ва 182 диск бо ғунҷоиши 2 048 гуфтори адабӣ коркард гардид.

Дар ин давра Кумита ҷиҳати ба роҳ мондани ҳамкориҳои судманд бо кишварҳои хориҷӣ дар соҳаи телевизион ва радио бо намояндагони соҳаҳои марбутаи Арабистони Саъудӣ, Белорус, Ширкати давлати пахши радиотелевизиони ПРАСАР Бҳарати Ҳиндустон (маҷозӣ) мулоқотҳо анҷом дода, дар ҷаласаи гурӯҳи кории кишварҳои иштирокдори ИДМ ширкат варзид.

Ҳамчунин дар ин давра 6 нафар корманди кумита ба мақсади иштирок дар семинарҳои омӯзишӣ ба кишварҳои Чин ва Ҳиндустон сафар карданд.

Айни замон Кумита бо як қатор давлати хориҷӣ, аз ҷумла Ҷумҳуриҳои Озарбойҷон, Чин, Кореяи Ҷанубӣ, Туркия, Эрон, Италия, Федератсияи Россия, Иёлоти Муттаҳидаи Амрико, Ҳиндустон, Украина, Туркманистон, Покистон, Афғонистон, Белорус, Ӯзбекистон, Қирғизистон, Давлати Фаластин, Давлати Қувайт дар соҳаи телевизион ва радио санадҳои ҳамкорӣ дорад. Ҳамчунин Кумита бо сохторҳои марбутаи Арабистони Саудӣ, Фаронса ва Малайзия масъалаҳои ҳамкориро дар самти табодули таҷриба, навор, истеҳсоли филмҳо ва дастрасии дастгоҳу таҷҳизоти соҳавӣ баррасӣ  менамояд.

Дар соли 2023 низ кормандони Кумитаи  телевизион ва радиои назди Ҳукумати Ҷумҳурии Тоҷикистон дар озмунҳои ҷумҳуриявии «Фурўғи субҳи доноӣ китоб аст» ва «Тоҷикон-оинаи таърихи миллат» фаъолона ширкат намуданд. 14 корманд аз сохторҳои гуногуни Кумита дар даври якуми озмунҳо ҷойҳои намоёнро ишғол карда, ба даври минбаъда роҳхат  гирифтанд.

Айни ҳол дар мамлакат 101 шабакаи давлативу хусусии телевизиону радио ва студияҳои истеҳсоли маҳсулоти аудиовизуалӣ, аз ҷумла 15 телевизиону 10 радиои давлатӣ, 18 телевизиони хусусӣ, 16 телевизиони ноқилӣ, 4 телевизиони IP, 24 радиои хусусӣ ва 14 студияи истеҳсоли маҳсулоти аудиовизуалӣ  фаъолият доранд.