Пешвои миллат Эмомалӣ Раҳмон: «Ноҳияи Роштқалъа маҳз аз баракати истиқлол ба чунин ободиҳо ноил гардидааст»
Роштқалъа дар даврони Истиқлолияти давлатӣ дубора ба ҳайси ноҳия таъсис ёфта, тайи зиёда аз сӣ соли даврони соҳибистиқлолии мамлакат аз баракати сиёсати хирадмандонаи Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон симои худро куллан дигаргун намудааст.
Гузашта аз ин, ҳар ташрифи Пешвои муаззами миллат ба шаҳру ноҳияҳои мамлакат, аз ҷумла ноҳияи зебоманзари Роштқалъа ба рушду нумуи он такони ҷиддӣ бахшида, дар ин замина корҳои ободонӣ боз ҳам пурвусъат мегарданд.
Тавре Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон иброз намудаанд, «маҳз ба шарофати истиқлолу соҳибихтиёрӣ мо имконият пайдо намудем, ки захираҳои дар ихтиёрдоштаамонро ба хотири ободу пешрафта гардонидани тамоми гӯшаву канори мамлакат то дурдасттарин деҳоти он равона созем. Мисоли равшан ва намунаи возеҳи ин гуфтаҳо ҳамин ноҳияи Роштқалъа аст, ки маҳз аз баракати истиқлол ба чунин ободиҳо ноил гардидааст».
Махсусан зарфияти ноҳияи Роштқалъа вобаста ба таъмини ҳадафи якуми стратегии миллӣ – расидан ба истиқлолияти энергетикӣ хеле бузург буда, дар ин самт дар ноҳия корҳо бомаром идома доранд.
Бамаврид аст иброз намоем, ки Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон аз солҳои нахустини соҳибистиқлолӣ ба ин соҳа таваҷҷуҳи хосса зоҳир намуда, тадбирҳои зиёдеро дар ин бахш амалӣ намуданд ва мардуми шарифи ҷумҳурӣ дар партави ин иқдоми бузург корҳои зиёдеро анҷом дода истодаанд.
Чунонки Сарвари давлат таъкид менамоянд, «Ҳукумати мамлакат захираҳои гидроэнергетикиро сарвати миллӣ мешуморад».
Дар иртибот ба ин, 16 август дар идомаи сафари корӣ дар шаҳру ноҳияҳои Вилояти Мухтори Кӯҳистони Бадахшон Президенти Ҷумҳурии Тоҷикистон муҳтарам Эмомалӣ Раҳмон ба ноҳияи Роштқалъа ташриф оварда, нахуст бо зеристгоҳи барқии Неругоҳи барқи обии «Себзор» шинос шуда, онро мавриди истифода қарор доданд.
Масоҳати умумии зеристгоҳ 3 ҳазору 696 метри мураббаъро ташкил дода, шиддати он 110 киловолт буда, дар он 4 трансформатор, аз ҷумла 2 трансформатори асосӣ бо тавоноии 15 мегаволтампер, 1 трансформатори 35/10-киловолтаи тавоноиаш 2,5 мегаволтампер, 1 трансформатори сарфиёти худии 35/04-киловолтаи тавоноиаш 160 киловолтампер насб гардидааст.
Ҳамзамон Роҳбари давлат ба таври маҷозӣ хатҳои интиқоли барқи 110-киловолтаи «Себзор-Хоруғ»-ро бо дарозии 18 километр, ки 72 сутунпоя дорад, хати интиқоли барқи «Ванҷ-Рӯшон»-ро бо дарозии 57,3 километр, ки дорои 250 сутунпоя аст ва неругоҳи офтобиро дар ноҳияи Мурғоб мавриди истифода қарор доданд.
Сарвари давлат ба таври маҷозӣ бо фаъолият ва иқтидори истеҳсолии неругоҳи офтобӣ дар ноҳияи Мурғоб шинос гардиданд, ки бо тавоноии 600 киловатт ва системаи захираи энергия дар батареяҳо 1200 киловатт/соат бунёд ёфта, масоҳаташ ба 12 ҳазор метри мураббаъ баробар мебошад. Дар он 1060 батареяи офтобӣ насб гардидааст.
Президенти Ҷумҳурии Тоҷикистон муҳтарам Эмомалӣ Раҳмон аз татбиқи лоиҳаҳо оид ба бунёди зеристгоҳҳои барқӣ дар минтақаҳои кӯҳистони Ватан изҳори қаноатмандӣ намуда, таъкид сохтанд, ки дастрасӣ ба энергия, хусусан барои минтақаҳои кӯҳистон дар роҳи расидан ба ҳадафҳои рушди устувор нақши калидӣ дорад.
Пешвои миллат муҳтарам Эмомалӣ Раҳмон сипас бо ҷараёни корҳои сохтмонӣ дар НБО-и «Себзор», ки дар ҳудуди ноҳияи Роштқалъа дар маҷрои дарёи Шохдара бунёд шуда истодааст, шинос шуданд.
Раванди бунёди ин неругоҳ ба марҳилаи муҳим баромада, маҷрои дарё дигар шуд ва корҳои сохтмонӣ дар сарбанди асосии неругоҳ шуруъ гардиданд. Сарбанди асосии НБО-и «Себзор» бо баландии 8 метр ва дарозии 60 метр бунёд шуда, ғунҷоиши оби он 5 миллион кубро ташкил хоҳад дод. Маҳз дар ин мавзеъ сохта шудани неругоҳ бесабаб нест, зеро суръати об дар ин қисмати дарё нисбатан тез буда, барои ҳаракати агрегатҳо мусоид мебошад.
Ғайр аз ин, дар давраи сохтмони иншооти мазкур 300 нафар сокинони маҳаллӣ бо кор таъмин шуда, худи неругоҳ бо иқтидори 11 мегаватт ба истифода супорида хоҳад шуд.
Дар ҷараёни шиносоӣ бо ҷараёни корҳои сохтмонӣ Роҳбари давлат ба фаъолияти бунёдкорони он баҳои баланд дода, масъулинро вазифадор намуданд, ки корҳои сохтмонӣ тибқи талаботи меъёрҳои замонавӣ ва дар муҳлатҳои муайяншуда ба анҷом расонида шаванд.
Хотирнишон бояд сохт, ки сохтмони ҳар неругоҳи дар мамлакат бунёдшаванда, аз ҷумла Неругоҳи барқи обии «Себзор» ҷиҳати расидан ба истиқлолияти комили энергетикӣ ва таъмини аҳолӣ бо неруи барқ, инчунин дар раванди саноатикунонии босуръати мамлакат мусоидати муҳим менамояд.
Ҳукумати мамлакат ба боло рафтани сатҳи некуаҳволии мардуми ҷумҳурӣ, боз ҳам беҳтар шудани шароити иҷтимоии аҳолӣ, инчунин хубтар гардидани шароити кории меҳнаткашон таваҷҷуҳи ҳамешагӣ зоҳир месозад.
Дар робита ба ин дар ноҳияи Роштқалъа солҳои охир якчанд корҳои назаррас ба анҷом расонида шуданд, ки мисоли онро мо дар бунёди хонаву биноҳои истиқоматӣ ва маъмурӣ дида метавонем.
Дар деҳаи Наҷини ноҳияи Роштқалъа хонаҳои навбунёди истиқоматӣ дар ҳудуди беш аз 1 гектар замини ҷудошуда, ки барои даҳ оила дар муҳлати як моҳ пурра бо сатҳу сифати баланд, бо дарназардошти тамоми шароити зарурӣ барои аҳолии аз офати табиӣ зарардида бунёд гардида буданд, аз ҷониби Пешвои миллат муҳтарам Эмомалӣ Раҳмон ба истифода дода шуданд. Ҳамзамон дар ин ҷо барои истироҳату фароғати сокинон майдончаи варзишӣ бо дарозии 30, паҳноии 20 метр ва ҷойи бозии кӯдакон бунёд гардидааст.
Барои хизматчиёни давлатӣ дар ноҳияи Роштқалъа бинои истиқоматии 5-ошёна дар масоҳати умумии 8 садяк замин бо имконияти маишӣ бунёд ёфта, мавриди баҳрабардорӣ қарор гирифт, ки хонаҳои истиқоматии он аз 1 ва 2-ҳуҷрагӣ иборат буда, дар маҷмуъ 25 ҳуҷраро дар бар мегирад.
Инчунин аз ҷониби Пешвои миллат бинои нави маъмурии шуъбаи Агентии меҳнат, муҳоҷират ва шуғли аҳолӣ бо беҳтарин шароити корию таълимӣ, ки аз 10 ҳуҷраи барҳавои корӣ ва 4 синфхонаи омӯзишӣ, ҳамчунин маҷлисгоҳ бо 20 ҷойи нишаст иборат мебошад, мавриди истифода қарор гирифт.
Дар ин самт дар ноҳияи Роштқалъа бо иштироки Роҳбари давлат бинои нави маъмурии Кумитаи идораи замин ва Корхонаи давлатии фаръии «Бақайдгирии молу мулки ғайриманқул», ки дар масоҳати 156 метри мураббаъ бунёд гардида, аз ду ошёна ва 11 ҳуҷраи корӣ, маҷлисгоҳ ва китобхона иборат мебошад, мавриди баҳрабардорӣ қарор дода шуд.
Зимни сафари корӣ Пешвои миллат бо роҳбарон ва фаъолони ноҳияи Роштқалъа мулоқот ва суханронӣ намуданд. Иброз гардид, ки дар асоси нақшаи чорабиниҳои омодагӣ ба таҷлили 35-солагии истиқлолияти давлатӣ дар ҳудуди ноҳия бунёду навсозии 205 иншооти иқтисодиву иҷтимоӣ ба маблағи умумии қариб як миллиард сомонӣ ба нақша гирифта шуда, то имрӯз 50 иншоот ба истифода супорида шудааст.
Ҳол он ки дар ноҳия то ҷашни 30-солагии Истиқлолияти давлатӣ 175 иншооти таъйиноти гуногун бунёд гардида буд.
Барои рушди соҳаҳои гуногуни ноҳия аз ҳисоби маблағҳои буҷетӣ барои дастгирии буҷети маҳаллӣ ба миқдори 392 миллион сомонӣ ҷудо гардидааст. Бо дарназардошти ин, дар ин давра дар ҳудуди ноҳия 10 лоиҳаи сармоягузории давлатӣ ба маблағи 18 миллион сомонӣ амалӣ гардида, ҳоло иҷрои корҳо дар доираи се лоиҳаи дигар ба маблағи беш аз 730 миллион сомонӣ идома ёфта истодаанд.
Дар доираи Барномаи рушди иҷтимоиву иқтисодии ноҳияи Роштқалъа барои солҳои 2021 – 2025 татбиқи 92 лоиҳа ба маблағи беш аз 222 миллион сомонӣ пешбинӣ гардида, аз ин ҳисоб то ба имрӯз 13 лоиҳа ба маблағи 80 миллион сомонӣ ба анҷом расидааст. Дар зарфи 32 соли соҳибистиқлолӣ аз ҷониби ташкилоти қарзӣ барои тақвият бахшидани корҳои ободониву бунёдкорӣ ва рушди инфрасохтори ноҳия ба маблағи беш аз 132 миллион сомонӣ қарз дода шудааст.
Тазаккур дода шуд, ки дар ноҳияи Роштқалъа ҳамагӣ 4 корхонаи саноатӣ фаъолият менамояд. Дар ин маврид Роҳбари давлат иброз намуданд, ки «вазъи рушди соҳаи саноат дар ноҳия ба талаботи ҳадафи стратегии миллӣ – саноатикунонии босуръати мамлакат ҷавобгӯ нест ва аз роҳбарону масъулин андешидани тадбирҳои мушаххасро дар ин самт тақозо менамояд».
Бори дигар лозим ба таъкиди хос аст, ки аз қудуми мубораки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба ноҳияи Роштқалъа ва ба истифода дода шудани якчанд иншооти муҳим корҳои ободгариву созандагӣ вусъати тоза ёфта, ба рушду инкишофи минбаъдаи иқтисодиву иҷтимоии ин гӯшаи Ватани азизи мо боз ҳам такони ҷиддӣ мебахшад. Чунонки шоир барҳақ фармудааст:
Роштқалъа, ки буд маскани шеър,
Махзани лоҷуварду хонаи меҳр,
Мешавад Себзор хонаи нур,
Шодӣ орад ба халқу базму сурур,
Қадами Пешво расад ҳар ҷо,
Нур пошад зи арш то ба само.
Нурулло ОҚИЛЗОДА,
мушовири калони бахши ёрдамчии
Президенти Ҷумҳурии Тоҷикистон
оид ба масъалаҳои рушди иҷтимоӣ
ва робита бо ҷомеа
