Имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Раиси Вилояти Мухтори Кӯҳистони Бадахшон Алишер Мирзонабот доир ба боришоти барфи шадиду фаромадани тарма, ки боиси талафоти ҷонӣ ва хисороти моддӣ шудааст ва оид ба бартарафкунии оқибатҳои офати табиӣ дар шаҳри Хоруғ суҳбати телефонӣ анҷом доданд.

Ёдовар мешавем, ки дар натиҷаи боришоти барфи зиёд дар се шабонарӯзи охир баландии барф бештар аз як метрро ташкил дода, дар шаҳри Хоруғ тарма фаромад.

Сарвари давлат муҳтарам Эмомалӣ Раҳмон вобаста ба ҳар чӣ зудтар бартараф кардани оқибатҳои офати табиӣ ва расондани кумаки моддӣ ба оилаҳои зарардидагон ба Сарвазири мамлакат, роҳбарияти Вилояти Мухтори Кӯҳистони Бадахшон, Вазорати корҳои дохилии Ҷумҳурии Тоҷикистон ва Кумитаи ҳолатҳои фавқулода ва мудофиаи гражданӣ дастуру супоришҳои мушаххас доданд.

АМИТ «Ховар»

Интизор меравад, ки дар Форуми тиҷоратии Тоҷикистон ва Русия, ки оғози моҳи март дар Душанбе баргузор мегардад, беш аз 160 соҳибкори рус иштирок намоянд. Дар ин хусус Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Саъдӣ Қодирзода 14 феврал дар ҷамъи хабарнигорон дар Душанбе иттилоъ дод.

Мавсуф иброз дошт, ки баргузории Форуми тиҷоратии Тоҷикистон ва Русия бо мақсади тақвияти ҳамкории мутақобилан судманди байнидавлатӣ дар доираи сафари Сарвазири Федератсияи Русия Михаил Мишустин ба Ҷумҳурии Тоҷикистон ба нақша гирифта шудааст.

Федератсияи Русия яке аз шарикони асосии тиҷоратии Тоҷикистон буда, тибқи омори расмӣ, соли 2022 ба Тоҷикистон дар ҳаҷми 26,4 миллион сармояи русӣ ворид гардидааст. Инчунин дар Тоҷикистон бо ҷалби сармояи Русия даҳҳо корхонаҳои муштараки саноатӣ, инфрасохтори гуногун, бахусус муассисаҳои таълимӣ бунёд гардидаанд.

Саъдӣ Қодирзода афзуд, ки дар доираи Форуми тиҷоратии Тоҷикистон ва Русия доираҳои тиҷоратию соҳибкории ду давлат масъалаҳои мубрами таҳкими ҳамкории марбут ба рушди тиҷорат ва сармоягузориро матраҳ менамоянд.

Инчунин мулоқоти доираҳои соҳбкории Тоҷикистон ва Русия дар сиғаи B2B (cоҳибкор бо соҳибкор) баргузор гардида, ба имзо расонидани созишномаҳои ҳамкорӣ дар назар аст.

Зимни вохӯрии корӣ дар шаҳри Женева, қароргоҳи Созмони умумиҷаҳонии савдо масъалаҳои ҳифзи моликияти зеҳнӣ дар низоми Тоҷикистон ва дастовардҳои он муаррифӣ карда шуданд. Ҳайати Тоҷикистонро муовини якуми Вазири рушди иқтисод ва савдо Ашурбой Солеҳзода роҳбарӣ намуд. Дар ин хусус ба АМИТ «Ховар» дар Вазорати рушди иқтисоди мамлакат хабар доданд.

Ҳамзамон пешниҳод гардид, ки ҷиҳати баланд бардоштани иқтидори сохторҳои давлатии дахлдор ба Тоҷикистон кумаки техникӣ ва мусоидат сурат гирад.

Дар анҷоми вохӯрӣ ҳайати расмии Тоҷикистон омодагии худро ҷиҳати боз ҳам густариш додани ҳамкории мутақобилан судманд ва амалӣ гардидани ташаббусҳои гуфташуда баён намуд.

Инчунин пешниҳод ҷиҳати расонидани кумаки техникӣ ва мусоидат ба Тоҷикистон аз тарафи созмон дастгирӣ ёфт.

АМИТ «Ховар»

Таҳқиқот нишон медиҳад, ки обшавии пиряхҳо ҳаёти миллионҳо одамонро зери хатар мегузорад, аммо на ҳамеша дар он ҷойҳое, ки қаблан тахмин мерафт. Пиряхҳо «дарёҳои ях» мебошанд, ки дар тӯли миллионҳо сол аз барфи фишурда ба вуҷуд омадаанд. Онҳо хеле оҳиста аз водиҳо ҷорӣ мешаванд ва баъзан онҳо чунон калон мешаванд, ки ба яхбандиҳои воқеӣ, ки ба баҳр мераванд, мубаддал мегарданд, менависад Science Alert. Дар ин бора АМИТ «Ховар» бо истинод ба АЗЕРТАҶ хабар медиҳад.

Маълум аст, ки гармшавии глобалӣ ва тағйирёбии ҳарорати сайёра бар зарари пиряхҳост — дар натиҷа имрӯз онҳо назар ба интизории олимон зудтар об мешаванд. Пешгӯӣ шудааст, ки то охири аср тақрибан нисфе аз 215 ҳазор пирях дар рӯи Замин нест хоҳанд шуд.

Тадқиқоти нави олимони Донишгоҳи Нюкасл дар Британияи Кабир нишон медиҳанд, ки оқибатҳои обшавии пиряхҳо барои миллионҳо нафар дар чаҳор давлат – Ҳиндустон, Покистон, Перу ва Чин харобиовар хоҳанд буд. Муҳаққиқон муайян кардаанд, ки дар ин кишварҳо аҳолӣ махсусан ба офатҳои табиӣ осебпазиранд ва шумораи кӯлҳои пиряхӣ дар онҳо зиёданд.

Тадқиқот бо роҳбарии Каролин Тейлор нишон медиҳад, ки тақрибан 15 миллион нафар метавонанд дар зери хатар қарор гиранд, зеро онҳо дар поёноби кӯли азими пирях, ки метавонад таркад, зиндагӣ мекунанд.