Ахбор

Маросими ифтитоҳи пайкараи  олими тоҷик, шоир, файласуф ва табиб Абӯалӣ ибни Сино дар ҳошияи сафари кории Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Қазоқистон доир гардид.

Дар маросими пардабардории аз рўи ин пайкара  вазирони фарҳанги Қазоқистон ва Тоҷикистон иштирок намудаанд.

Ибни Сино- олим, файласуф ва табиби форс-тоҷик мебошад, ки дар асрҳои X-XI зиндагӣ намуда, дар Ғарб бо унвони «Авитсена» маъруф гардидааст.

Ибни Сино беш аз 450 рисола дар соҳаҳои гуногуни илм навиштааст, ки то замони мо танҳо 240-тои он маҳфуз мондаанд. Ин рисолаҳо аксар соҳаҳои илмро фаро гирифта, хусусан 150-тои он дар илми фалсафа ва беш аз 40-тои дигар дар соҳаи пизишкӣ дахл доранд. Маъруфтарин асарҳои ӯ «аш-Шифо» ва «ал-Қонуну фи-т-тиб» ҳастанд, ки аз ҷумлаи бузургтарин донишномаҳои тахассусӣ ва фалсафӣ буда, дар донишгоҳҳои Аврупо то садаи XIX тадрис мешуданд.

Абӯалӣ ибни Сино дар рушди илми тиб саҳми бениҳоят арзанда гузоштааст, ки онҳо аз таҷрибаҳои ӯ, илми пизишкии олими юнонӣ Гален, метафизикаи Арасту, илми пизишкии Эрони бостон, Байнаннаҳрайн ва Ҳинди бостон сарчашма гирифта, онҳоро ҳамҷоя андӯхтааст. Сино ҳамчунин падари тибби замонавӣ ва дорушиносӣ шуморида мешавад.

25 август Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати анҷом додани сафари корӣ ба Ҷумҳурии Қазоқистон сафар намуданд.

Дар фурудгоҳи байналмилалии Душанбе Президенти Ҷумҳурии Тоҷикистон муҳтарам Эмомалӣ Раҳмонро Раиси Маҷлиси миллии Маҷлиси Олии Ҷумҳурии Тоҷикистон, Раиси Маҷлиси намояндагони Маҷлиси Олии Ҷумҳурии Тоҷикистон, Сарвазири Ҷумҳурии Тоҷикистон, Роҳбари Дастгоҳи иҷроияи Президенти Ҷумҳурии Тоҷикистон ва дигар шахсони расмӣ гусел намуданд.

Дар ин сафар Президенти Ҷумҳурии Тоҷикистон муҳтарам Эмомалӣ Раҳмонро Вазири корҳои хориҷӣ, ёрдамчиёни Президенти Ҷумҳурии Тоҷикистон оид ба масъалаҳои робитаҳои хориҷӣ ва масъалаи кадрҳо, вазирони фарҳанг, кишоварзӣ, саноат ва технологияҳои нав, меҳнат, муҳоҷират ва шуғли аҳолӣ, раиси вилояти Суғд ва дигар шахсони расмӣ ҳамроҳӣ менамоянд.

Сафари навбатии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 15–18 августи соли равон ба Вилояти Мухтори Кӯҳистони Бадахшон дар шароите доир гардид, ки вилоят ба марҳилаи нави рушди иҷтимоию иқтисодии худ ворид гардида, сокинони сарбаланди он бо сарфарозию шодӣ аз ин пайк истиқболи нек намуданд.

Барномаи давлатӣ оид ба омӯзиш ва ҳифзи пиряхҳо барои солҳои 2010-2030   такмил дода шуд. Дар ин хусус ба хабарнигори АМИТ «Ховар» Директори Муассисаи давлатии илмии «Маркази омӯзиши пиряхҳои Академияи миллии илмҳои Тоҷикистон», профессор Абдулҳамид Қаюмов хабар дод.

Нақшаи нави чорабиниҳо вобаста ба иҷрои «Барномаи давлатӣ оид ба омӯзиш ва ҳифзи пиряхҳои Тоҷикистон барои солҳои 2010-2030» дар асоси қарори ҷаласаи назди Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, ки 14 марти соли 2022 баргузор шуд, омода шудааст.

Абдулҳамид Қаюмов иброз дошт, ки дар ҷаласа таъкид шуд, ки  «Барномаи давлатӣ оид ба омӯзиш ва ҳифзи пиряхҳои Тоҷикистон барои солҳои 2010-2030» ба тариқи зарурӣ иҷро нашудааст. Феҳристи пиряхҳо, ки яке аз вазифаҳои асосии ин барнома ба ҳисоб меравад, аз соли 2010 то имрӯз омода нашудааст. Аз ин лиҳоз Маркази омӯзиши пиряхҳо муваззаф гардонида шуд, ки «Барномаи давлатӣ оид ба омӯзиш ва ҳифзи пиряхҳои Тоҷикистон барои солҳои 2010-2030»-ро такмил дода, онро ба ду марҳалаи иҷро тақсим намояд. Марҳалаи аввал солҳои 2023-2026 ва марҳалаи дуюм солҳои 2027-2030-ро дар бар гирифта, барои иҷрои барнома ягон маблағи иловагӣ талаб намешавад».