Ахбор

15 август Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади шиносоӣ бо ҷараёни тадбирҳои ободонӣ ба истиқболи ҷашни 35-солагии Истиқлоли давлатӣ ва суҳбату мулоқот бо сокинон ба Вилояти Мухтори Кӯҳистони Бадахшон ташриф оварданд.

Сафари кории Сарвари давлат муҳтарам Эмомалӣ Раҳмон дар вилояти Бадахшон аз ноҳияи Дарвоз оғоз ёфт.

Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Дарвоз нахуст бо ҷараёни корҳои таҷдиду навсозии қитъаи роҳи “Қалъаи Хумб-Ванҷ, сарҳади ноҳияи Рӯшон” дар доираи Лоиҳаи таҷдиди роҳи автомобилгарди Душанбе-Қулма шинос шуданд.

Ин қитъаи роҳ 109 километрро дар бар гирифта, ҳудуди ноҳияи Дарвоз ва Ванҷро убур мекунад. Он аз байни қаторкӯҳҳои Дарвоз гузашта, дар миқёси ҷумҳурӣ роҳи душворгузар маҳсуб мешавад ва солҳои тӯлонӣ таъмири асосиро надидааст.

Баъди пурра таҷдиду навсозӣ намудан ин қитъа 16 километр кӯтоҳ гардида, дар умум 92,3 километрро ташкил хоҳад дод.

Аз 14 то 26 август даври сеюми Озмуни ҷумҳуриявии «Фурӯғи субҳи доноӣ китоб аст» дар шаҳри Душанбе, Вилояти Мухтори Кӯҳистони Бадахшон, вилоятҳои Суғду Хатлон, шаҳру ноҳияҳои тобеи ҷумҳурӣ баргузор мегардад. Дар ин хусус  АМИТ «Ховар» бо истинод ба маркази матбуоти Вазорати маориф ва илми Ҷумҳурии Тоҷикистон хабар медиҳад.

Бо мақсади шаффоф баргузор намудани озмуни мазкур дирӯз дар шаҳри Душанбе бо иштироки Раиси комиссияи ҷумҳуриявии озмун, муовини Сарвазири Ҷумҳурии Тоҷикистон Матлубахон Сатториён, Вазири маориф ва илм, аъзои комиссия, ҳайати ҳакамони даври сеюми озмун, комиссияи аппелятсионӣ, намояндагони раёсату шуъбаҳои маориф ва дигар масъулон ҷаласаи корӣ доир шуд.

Гуфта шуд, ки соли панҷум аст, ки таҳти сарпарастии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Озмуни ҷумҳуриявии «Фурӯғи субҳи доноӣ китоб аст» баргузор мегардад. Дар озмун ҳамасола довталабони зиёде иштирок меварзанд ва он ба дарёфти чеҳраҳои наву наврасону ҷавонони лаёқатманд мусоидат менамояд.

11 август дар Душанбе нахустнамоиши филми мустанади «Фасли навини футбол», ки ба муваффақияту дастовардҳои футболи Тоҷикистон дар даҳ соли охир таҳти роҳбарии Президенти Федератсияи футболи Тоҷикистон муҳтарам Рустами Эмомалӣ бахшида шудааст, баргузор шуд. Дар ин хусус АМИТ «Ховар» бо истинод ба бошгоҳи футболи «Истиқлол» хабар медиҳад.

Филми ҳуҷҷатӣ бо ташаббуси бошгоҳи футболи «Истиқлол» ва шабакаи телевизионии «Варзиш» омода шудааст.  Дар маросими нахустнамоиши филм роҳбарияти Мақомоти иҷроияи ҳокимияти давлатии шаҳри Душанбе, Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Федератсияи футболи Тоҷикистон, Кумитаи миллии олимпии Тоҷикистон, инчунин собиқадорон ва мухлисони футбол, футболбозон ва намояндагони ВАО иштирок намуданд.

Дар Боғи фарҳангиву фароғатии ба номи Садриддин Айнӣ маросими оғози даври дуюми Фестивал-озмуни ҷумҳуриявии телевизионии эҷодиёти халқ «Андалеб-2023» доир  гардид. Дар ин давр  санъаткорону ҷавонони боистеъдоди шаҳри Панҷакент ва ноҳияи Рӯдакӣ ҳунарнамоӣ намуда, расму оин, урфу одат, маросими хурсандии худро ба воситаи рақс, оҳангу сурудҳо манзури ҳайати ҳакамон ва тамошобинон гардониданд. Дар ин хусус ба АМИТ «Ховар» дар Вазорати фарҳанги Тоҷикистон иттилоъ доданд.

Мақсад аз баргузор намудани Фестивал-озмуни телевизионии эҷодиёти халқ «Андалеб»-2023- ин намоиш додани дастовардҳои ҳунарию фарҳангӣ ва ҳунарҳои мардумӣ буда, ба ин васила баланд бардоштани худшиносии миллӣ, тақвияти ватандӯстӣ, ифтихори миллӣ, тарғиби арзишҳо ва мероси пурғановати фарҳанги миллӣ, ваҳдату ягонагӣ ва дӯстӣ мебошад.

Ёдовар мешавем, ки даври дуюми Фестивал-озмуни ҷумҳуриявии телевизионии эҷодиёти халқ «Андалеб-2023» аз 11 то 18 август дар Боғи фарҳангию фароғатии ба номи Садриддин Айнӣ баргузор мегардад.