Бо мақсади ташвиқу тарғиби ташаббуси 5-уми ҷаҳонии Ҷумҳурии Тоҷикистон ва эълон гардидани соли 2025 Соли байналмилалии ҳифзи пиряхҳо дар маркази маъмурии вилояти Суғд –шаҳри Хуҷанд лавҳаи бузурги иттилоотӣ насб гардид. Дар ин бора ба АМИТ «Ховар» дар Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ доданд.

Ҳадаф аз насби лавҳаи иттилоотӣ баланд бардоштани маърифати экологии аҳолӣ, ташвиқи ташаббуси панҷуми глобалии Президенти Тоҷикистон муҳтарам Эмомалӣ Раҳмон мебошад.

Бояд тазаккур дод, ки 14 декабри соли 2022 бо қарори Маҷмаи умумии Созмони Милали Муттаҳид ташаббуси панҷуми глобалии Президенти Тоҷикистон муҳтарам Эмомалӣ Раҳмон қабул гардид. Тибқи он соли 2025 Соли байналмилалии ҳифзи пиряхҳо ва 21 март Рӯзи ҷаҳонии пиряхҳо эълон гардид.

Қабул гардидани Қатъномаи Маҷмаи умумии Созмони Милали Муттаҳид дар бораи эълони соли 2025 Соли байналмилалии ҳифзи пиряхҳо ва 21 март Рӯзи ҷаҳонии пиряхҳо барои аҳли башар дар ҳалли масъалаҳои марбут ба тағйирёбии иқлим, ҳифзи пиряхҳо ва рафъи норасоии об дар сайёра муҳим ва саривақтӣ буда, бузургтарин дастоварди мамлакати мо дар арсаи байналмилалист.

Бахшида ба Ҷашни байналмилалии Наврӯз дар 68 шаҳру ноҳияи Тоҷикистон мусобиқаи варзишии гӯштини миллӣ (гӯштингирӣ) доир карда мешавад. Дар ин хусус ба АМИТ «Ховар» дар Раёсати тарбияи ҷисмонӣ ва инкишофи варзиши дастгоҳи марказии Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Мақсад аз баргузории мусобиқаҳои мазкур иҷрои дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати рушд додани мусобиқаҳои варзишӣ ва оммавигардонии намудҳои маъмулии варзиш мебошад.

Дар ҳамин замина нақшаи чорабиниҳои Кумита таҳия гардида, мавриди корбарӣ қарор гирифтааст.

Бояд тазаккур дод, ки Мусобиқаи ҷумҳуриявии гӯштини миллӣ (гӯштингирӣ) ҳамасола бо мақсади ташвиқу тарғиби гӯштини миллӣ дар ҷумҳурӣ, фароҳам овардани имконоти фароғатию истироҳатӣ ва таъмини оммавияти варзиш дар мамлакат, мустаҳкам намудани дӯстиву рафоқат байни варзишгарон, баланд бардоштани маҳорати касбии онҳо, муайян намудани дастаи мунтахаби Ҷумҳурии Тоҷикистон, ҷалби ҷавонон ба ин намуди варзиш, ҳавасмандгардонии онҳо ва муаррифии паҳлавонон миёни варзишгарони ҷумҳурӣ бо шукӯҳу шаҳомат ва дар сатҳи баланд гузаронида мешавад.

АМИТ «Ховар»

24 феврал Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ дар шаҳри Душанбе дар арафаи бедоршавии табиат чун анъанаи наку бо шинонидани ниҳолҳои нодири сояафкани ороишӣ ва ҳамешасабз ба маъракаи ниҳолшинонӣ, оғози корҳои мавсими баҳорӣ, вусъати тадбирҳои ободонию сабзазоркунӣ ва сабзу хуррамгардонии муҳити атроф ҳусни оғоз бахшиданд.

 Бояд гуфт, ки шуруъ аз рӯзҳои аввали фасли баҳор бо дастури Президенти мамлакат муҳтарам Эмомалӣ Раҳмон ба хотири беҳдошти ҳифзи табиат ва ободонии ҳар гӯшаву канори ҷумҳурӣ маъракаи умумии ниҳолшинонӣ ташкил карда мешавад.

Ин навбат Президенти мамлакат муҳтарам Эмомалӣ Раҳмон ва Раиси шаҳри Душанбе муҳтарам Рустами Эмомалӣ дар боғи нав дарахтони ороишии ҳамешасабзи магнолия ва секвоя шинониданд.

Масоҳати боғи нав 10 гектар ва дарахтоне, ки аз Аврупо барои бунёди боғ ворид гардидаанд, беш аз 11 ҳазор ададро ташкил медиҳанд.

Дар боғи дарахтони нодиру ҳамешасабз 15 нафар бо ҷойи кори доимӣ таъмин гардиданд.

23 феврал Тоҷикистон ва Иттиҳоди Аврупо раванди музокирот оид ба Созишномаи шарикӣ ва ҳамкории тавсеаёфта байни ҷонибҳоро оғоз карданд. Дар ин хусус ба АМИТ «Ховар» дар Вазорати корҳои хориҷии Ҷумҳурии Тоҷикистон хабар доданд.

Дар мулоқоти ҳайатҳо бо назардошти рушди босуботи Тоҷикистон ва гуногунҷанба шудани робитаҳои мутақобила зарурати бознигарӣ кардани Созишномаи шарикӣ ва ҳамкории аз соли 2005 амалкунанда таъкид карда шуд.

Созишномаи шарикӣ ва ҳамкории тавсеаёфта дар баробари густариши робитаҳои Тоҷикистон ва Иттиҳоди Аврупо дар бахшҳои савдо ва тиҷорат инчунин ба рушди ҳамкорӣ дар самтҳои сиёсату амният ва дигар соҳаҳои мавриди таваҷҷуҳи тарафайн мусоидат менамояд.