Ҳайати Малайзия барои иштирок дар Конфронси оби СММ-2023, ки моҳи март таҳти ҳамраисии Тоҷикистон ва Нидерланд дар Ню-Йорк баргузор мегардад, даъват карда шуд. Дар ин хусус ба АМИТ «Ховар» дар Вазорати корҳои хориҷии Ҷумҳурии Тоҷикистон хабар доданд.
14 феврал мулоқоти муштараки сафирони Ҷумҳурии Тоҷикистон ва Нидерланд дар Малайзия, инчунин ҳамоҳангсози доимии СММ дар Малайзия бо роҳбарияти вазорати захираҳои табиӣ, муҳити зист ва тағйирёбии иқлими Малайзия баргузор гардид.
Дар ҷараёни мулоқот сафирони Тоҷикистон ва Нидерланд дар бораи раванди тадорукот ба Конфронси оби СММ-2023 маълумот дода, даъват намуданд, то ҷониби Малайзия дар Конфронси таърихии дарпешистода дар сатҳи муносиб иштирок намояд ва ҳамчунин тибқи Рӯзномаи амал дар соҳаи захираҳои об тадбирҳо андешад.
Зимни мулоқот оид ба масъалаҳои ҳамкории дуҷониба ва бисёрҷониба, инчунин дигар масъалаҳои мавриди таваҷҷуҳи муштарак табодули назар сурат гирифт.
АМИТ «Ховар»
Дар Вазорати маориф ва илми Ҷумҳурии Тоҷикистон ҷаласаи якуми кумитаи тадорукоти Озмуни ҷумҳуриявии «Фурӯғи субҳи доноӣ китоб аст» доир гардид, ки дар кори он масъалаи дар сатҳи баланди омодагию ташкилӣ баргузор намудани ин озмун баррасӣ шуд. Дар ин хусус ба АМИТ «Ховар» дар маркази матбуоти вазорат хабар доданд.
Раиси комиссияи Озмуни ҷумҳуриявии «Фурӯғи субҳи доноӣ китоб аст», муовини Сарвазири Ҷумҳурии Тоҷикистон Матлубахон Сатториён аз ҳайати доварон даъват кард, ки дар ҷараёни озмун шаффофиятро таъмин намуда, бо иштирокдорон вобаста ба синну сол муносибат намоянд.
Таъкид карда шуд, ки бо ташаббуси Президенти Ҷумҳурии Тоҷикистон,Пешвои миллат муҳтарам Эмомалӣ Раҳмон дар мамлакат чор озмуни ҷумҳуриявӣ гузаронида мешавад ва ҳадафи асосии баргузории онҳо, пеш аз ҳама, дарёфти чеҳраҳои нави соҳибистеъдод, донишманд, китобхону сухандон ва тарғиби ҳунару фарҳанг ва илму дониш мебошад.
Дар охир ҳайати ҷаласаи озмун ҷиҳати баргузории даври аввали он қарорҳои дахлдор қабул намуд.
АМИТ «Ховар»
Имрӯз таҳти раёсати Президенти Ҷумҳурии Тоҷикистон, Пешвои миллат, Раиси Шӯрои амнияти Тоҷикистон муҳтарам Эмомалӣ Раҳмон ҷаласаи васеи Шӯрои амнияти мамлакат доир ба масъалаи вазъи муқовимат ба таҳдиду хатарҳои муосир ва чораҳои тақвият бахшидан ба таъмини амнияти давлат ва суботу оромии ҷомеа баргузор гардид.
Дар суханронии ифтитоҳии худ зимни таҳлили вазъияти воқеии минтақа ва ҷаҳони муосир Роҳбари давлат таъкид карданд, ки дар шароити ҳассоси имрӯза таҳкими амнияти миллӣ ва муътадил нигоҳ доштани фазои сиёсиву иҷтимоии ҷомеа барои давлатдории мо аҳаммияти аввалиндараҷа дорад.
Зикр гардид, ки вобаста ба вазъияти минтақа ва ҷаҳон масъалаҳои муқовимат ба хатару таҳдидҳои муосир, аз ҷумла терроризм ва экстремизм аҳаммияти торафт мубрам пайдо карда истодаанд.
Дар робита ба ин, сохтору мақомоти дахлдор вазифадор карда шуданд, ки корро ҷиҳати иҷрои талаботи «Стратегияи муқовимат ба терроризм ва экстремизм дар Ҷумҳурии Тоҷикистон барои солҳои 2021 – 2025» ба таври ҷиддӣ ҷоннок намоянд.
