Дар Душанбе ҷашни МЕҲРГОН бо Фестивали занбӯрпарварон, «Оши палов» ва Иди себу ангур доир гардид
Ҷашни Меҳргон дар аввали моҳи меҳр- оғози фасли тирамоҳи заррин таҷлил гардида, он яке аз куҳантарин ҷашнҳои мардуми ориёинажод мебошад. Гузаштагонамон онро ҳамчун ситоишу ниёиши Меҳр ё Митро ва рамзи аҳду паймон ва дӯстиву муҳаббати оини меҳрпарастӣ таъбир намудаанд. Меҳргон иди ҷамъоварии ҳосили рӯёнидаи деҳқон, иди фаровонӣ, шодию нишот, дӯстию рафоқат, ваҳдату ягонагӣ ва меҳру садоқат аст. Ин матлабро муовини Сарвазири Тоҷикистон Сулаймон Зиёзода зимни ифтитоҳи Иди Меҳргон дар шаҳри Душанбе баён намуд,.
Дар ин рӯз ҳамчунин Фестивали занбӯрпарварон, намоиш-фурӯши асал, Иди себу ангур, Фестивали «Оши палов», намоиш-фурӯши шолӣ ва биринҷ ва Озмуни ҷумҳуриявии фарҳанги меҳмондорӣ ва дастархонороӣ таҷлил гардид.
Дар ин ҷашнгоҳ кишоварзони мамлакат бо манора ва ороиши махсус навъҳои гуногуни зироат, меваю сабзавот ва полезиҳо, аз қабили харбузаву тарбуз, ангур, хурмою анор ва дигар навъи маҳсулоти кишоварзиро пешниҳод намудаанд, ки бори дигар сарзамини неъматофарин будани Тоҷикистонро нишон медиҳад.
Ҳадаф аз баргузории ҷашни ҳосилот тарғиби рушди маҳсулоти кишоварзӣ, муаррифии дастранҷи деҳқон, эҳё намудани анъанаҳои парвариши навъҳои гуногуни меваҷоту сабзавот ва баҳра бурдан аз таҷрибаи деҳқонон аст.
Тавре дар Вазорати кишоварзии Ҷумҳурии Тоҷикистон иттилоъ доданд, бо мақсади таъмини бозорҳои истеъмолии мамлакат бо маҳсулоти кишоварзӣ мувофиқи маълумоти оморӣ, дар ҳамаи шаклҳои хоҷагидории ҷумҳурӣ имсол дар масоҳати 861,1 ҳазор гектар зироати кишоварзӣ кишт карда шуд. Дар ҳамаи шаклҳои хоҷагидории ҷумҳурӣ истеҳсоли ғалладонагиҳо ба 1506,7 ҳазор тонна, пахта- 103,8 ҳазор тонна, картошка- 937,4 ҳазор тонна, сабзавот- 2669 ҳазор тонна, полезӣ- 1028,3 ҳазор тонна, мева- 614,8 ҳазор тонна, ангур- 196,3 ҳазор тонна ва гӯшт ба 213,6 ҳазор тонна расонида шудааст.
Боғпарварони мамлакат дар ин рӯз навъҳои гуногуни себу ангурро пешниҳод намуданд.
Ба гуфти масъулини кишоварзӣ, то 1 октябри имсол мевагиҳои ҷамъоваришуда 614 820 тоннаро ташкил медиҳанд, ки аз он себ 149 613 тонна ва ангур 196294 тоннаро дар бар мегирад.
Дар доираи баргузории Фестивали занбӯрпарварон, намоиш-фурӯши асал занбӯрпарварон навъҳои табиии асалро бо нархи дастрас пешниҳод намуданд. Дар ҷумҳурӣ имсол 4260 тонна асал истеҳсол карда шудааст.
Дар доираи Иди Меҳргон барои сокинон ярмарка-фурӯши маҳсулоти кишоварзӣ баргузор гардид.
Дар фарҷоми Иди Меҳргон аз ҷониби Вазорати кишоварзии Тоҷикистон ба кишоварзони фаъоли ҷумҳурӣ барои пешниҳоди маҳсулоти хушсифат ва саҳмгузорӣ дар таъмини амнияти озуқаворӣ аз рӯи номинатсияҳо Диплом, Сипоснома ва туҳфаҳои хотиравӣ тақдим гардиданд.
